Sosial

Ana səhifə

Sosial

Fuad Muradov “Böyük İpək Yolu” Gənclər İttifaqının sədri seçilib

29 iyun 2012 07:13 (UTC +04:00)

Bakı-APA. “Böyük İpək Yolu” I Beynəlxalq Gənclər Konqresi çərçivəsində, konqres iştirakçıları olan 25 ölkə tərəfindən “Böyük İpək Yolu” Gənclər İttifaqının əsası qoyulub.

APA-nın məlumatına görə, tədbir iştirakçıları “Böyük İpək Yolu” Gənclər İttifaqının yaranması ilə bağlı Bakı deklarasiyası, ittifaqın nizamnaməsi, sədrlik və büro məsələləri ilə əlaqədar geniş müzakirələr aparıb. Müzakirələr nəticəsində, ittifaqın sədri postuna millət vəkili, Azərbaycan Respublikası Gənclər Təşkilatları Milli Şurasının sədri Fuad Muradovun namizədliyi irəli sürülüb və səsvermə nəticəsində 22 iştirakçı ölkə onun namizədliyinin lehinə səs verib.

İştirakçı ölkələr sədr müavini və büro üzvlüyü ilə seçkilərdə namizədlərin təyin edilməsi məqsədi ilə Avropa qrupu, Asiya qrupu, Ərəb ölkələri qrupu və keçmiş Sovet İttifaqı ölkələri olmaqla 4 regional qrupa bölünüb.

Daha sonra, Qazaxıstan, Misir, Hindistan və Macarıstandan olmaqla ittifaqın 4 sədr müavinləri, o cümlədən 7 Büro üzvü seçilib.

İttifaqın ikinci görüşünün oktyabr ayında Qazaxıstanda keçirilməsi təklif olunub.

Qeyd edək ki, tədbir iştirakçıları tarixi İpək Yolu ticarət yolu üzərində yerləşən 25 ölkədən ibarətdir.