Sosial

Ana səhifə

Sosial

Azərbaycanla Rusiya arasında əmək miqrasiyası sahəsində əməkdaşlıq haqqında saziş layihəsi iki ölkənin hökumətlərilə razılaşdırılıb

18 dekabr 2006 09:29 (UTC +04:00)

Azərbaycanla Rusiya arasında əmək miqrasiyası proseslərinin tənzimlənməsi məqsədilə respublikanın əmək və əhalinin sosial müdafiəsi naziri Füzuli Ələkbərovun başçılığı ilə nazirliyin nümayəndə heyətinin Moskva şəhərinə işgüzar səfəri başa çatıb. Əmək və Əhalinin Sosial Müdafiəsi Nazirliyindən APA-ya verilən məlumata görə, səfər çərçivəsində Rusiyanın səhiyyə və sosial inkişaf naziri Mixail Zurabov, Federal Miqrasiya Xidmətinin direktoru Konstantin Romodanovski və direktorun I müavini Vyaçeslav Postavnin, Beynəlxalq Əmək Təşkilatının regional ofisinin rəhbəri Verner Blenklə görüşlər keçirilib.
Danışıqlar zamanı Rusiya ərazisində işləyən vətəndaşlarının əmək fəaliyyətlərinin hüquqi əsaslar üzərində qurulmasına MDB ölkələrindən ilk olaraq Azərbaycan rəhbərliyinin diqqət yetirdiyi xüsusi vurğulanıb, vətəndaşlarının əmək fəaliyyətlərinin leqallaşdırılması prosesinə Azərbaycan hökumətinin köməklik təşəbbüsləri yüksək qiymətləndirilib. Rusiya tərəfi bu ölkənin iqtisadiyyatının inkişafında Azərbaycan miqrantlarının xüsusi rolu olduğunu qeyd edərək problemlərin həllinə RF-nin Səhiyyə və Sosial İnkişaf Nazirliyi, həmçinin Federal Miqrasiya Xidməti tərəfindən xüsusi diqqət yetiriləcəyi vurğulanıb.
Bu sahədəki işlərin Azərbaycan tərəfi ilə əlaqəli şəkildə həyata keçirilməsi, həmçinin yarana biləcək problemlərin operativ həllini təmin etmək məqsədilə F.Ələkbərovla M.Zurabov arasında görüş zamanı qısa müddət ərzində cari fəaliyyət planının hazırlanması qərara alınıb. Eyni zamanda, Rusiya Federal Miqrasiya Xidmətində aparılan danışıqlar nəticəsində əldə edilən razılığa əsasən, Azərbaycan vətəndaşlarının üzləşə biləcəkləri problemlərin həllilə bağlı tədbirlərin görülməsi üçün Ümumrusiya Azərbaycan Konqresinin nümayəndəsi Azərbaycan tərəfinin əlaqələndirici nümayəndəsi müəyyənləşdirilib və Federal Miqrasiya Xidmətinin rəhbərliyinə təqdim olunub.
Rusiya rəsmiləri həmçinin bildiriblər ki, Azərbaycan vətəndaşlarının RF ərazisində əmək fəaliyyətinin leqallaşdırılması işi uğurla həyata keçirilərsə bu, əlavə olaraq Azərbaycan vətəndaşlarının Rusiya əmək bazarında iştirakı üçün imkanları genişləndirəcək, onların sosial təminatı, əmək, tibbi və təhsili ilə bağlı məsələlərinə xüsusi yanaşmalar tətbiq ediləcək.
Səfər proqramına müvafiq olaraq, layihəsi Əmək və Əhalinin Sosial Müdafiəsi Nazirliyi tərəfindən hazırlanan “Azərbaycan Respublikası Hökuməti ilə Rusiya Federasiyası Hökuməti arasında əmək miqrasiyası sahəsində əməkdaşlıq haqqında Saziş” tərəflərin aidiyyəti dövlət orqanlarının Azərbaycan tərəfindən Əmək və Əhalinin Sosial Müdafiəsi, Daxili İşlər, Ədliyyə və Xarici İşlər nazirliklərinin, həmçinin Azərbaycanın RF-dəki səfirliyinin və Ümumrusiya Azərbaycan Konqresinin, Rusiya tərəfindən isə Səhiyyə və Sosial İnkişaf, Xarici İşlər və Daxili İşlər nazirliklərinin, eləcə də Federal Miqrasiya Xidmətinin ekspertlərilə müzakirə edilib və Rusiyanın bu sahədəki qanunvericiliyinin yeni müddəaları da nəzərə alınaraq təkmilləşdirilib.
Rusiya ərazisində pərakəndə ticarət sahəsində çalışan Azərbaycan vətəndaşlarının rastlaşa biləcəkləri problemlərin həllilə əlaqədar F.Ələkbərovun Azərbaycanın Rusiyadakı səfiri Polad Bülbüloğlu, Ümumrusiya Azərbaycan Konqresinin sədri Məmməd Əliyev və ÜAK-ın rəyasət heyətinin üzvlərilə görüşləri olub və birgə məsləhətləşmələr aparılıb. İştirakçılar RF hökumətinin əcnəbilərin pərakəndə ticarət sahəsində işləmələrinin məhdudlaşdırılması ilə bağlı qərarının icrasına məsul olan aidiyyati dövlət orqanlarının rəhbərliyi ilə keçirilən görüşlər nəticəsində yaradılan yeni imkanların qarşıda duran vəzifələrin daha səmərəli şəkildə həyata keçirilməsində çox böyük əhəmiyyətli olacağını qeyd ediblər. Səfər zamanı Azərbaycan nümayəndə heyəti MDB ölkələrinin əmək, miqrasiya və əhalinin sosial müdafiəsi məsələləri üzrə Məsləhət Şurasının 19-cu iclasında iştirak edib və bu sahələr üzrə Azərbaycanın maraqları nəzərə alınmaqla müvafiq protokol imzalanıb. /APA/