Sosial

Ana səhifə

Sosial

Gələn ilin sonuna Azərbaycanda yaşa görə əmək pensiyalarının baza hissəsi 50 AZN-ə çatdırılacaq

28 dekabr 2006 12:27 (UTC +04:00)

APA-nın bildirdiyinə görə, bu barədə jurnalistlərə Dövlət Sosial Müdafiə Fondunun (DSMF) sədri Səlim Müslümov məlumat verib.
S.Müslümovun sözlərinə görə, dövlət başçısının imzaladığı fərmanla yanvarın 1-dən yaşa görə əmək pensiyalarının baza hissəsi 5 AZN artaraq 40 AZN təşkil edəcək, 2008-ci ildə isə pensiyaçılar üçün yaşayış minimumunu keçəcək. Bu fərman respublikadakı 1 mln. 186 min pensiyaçıdan 1 mln. 178 min nəfərinə şamil olunur: “Ölkədəki 1 mln. 186 min pensiyaçıdan 7 400 nəfəri dövlət qulluqçusu, 500 nəfər isə güzəştli kateqoriyadan olanlardır. Bunlara prokurorluq, məhkəmə orqanlarında çalışanlar, ombudsman aparatında çalışanlar və millət vəkilləri kimi pensiya alanlar daxildir”.
Fond sədrinin sözlərinə görə, oktyabrın 1-i məlumatlarına əsasən, 1 mln. 178 min nəfər pensiyaçının 23 254 nəfəri əlilliyə görə pensiya alır və artımın 55%-lik hissəsi bu kateqoriyaya şamil olunur.
Pensiyaların baza hissəsinin artımı pensiyaçılar arasında aşağıdakı formada olacaq:
Gözdən əlillər (5 825 nəfər) üçün 10,5 AZN;
Milli Qəhrəman ailəsi statusuna malik olanlar (31 nəfər) üçün - 10 AZN;
Siyasi repressiyalara məruz qalmış və sonradan bəraət alanlar (2089 nəfər) üçün - 5,5 AZN;
Qarabağda, eləcə də Əfqanıstanda və digər hərbi əməliyyatlarda iştirak edənlər üçün 5,5 AZN;
Yaşa görə pensiya alan müharibə əlilləri üçün: I qrup (1 327 nəfər) üçün 10,5 AZN, II qrup (2 184 nəfər) üçün 8,5 AZN, III qrup (135 nəfər) üçün 7,5 AZN.
Qeyd edək ki, hazırda 1 nəfərə düşən pensiyanın orta məbləği 42,2 AZN təşkil edir. Artımın tətbiqindən sonra bu rəqəm 48,2 AZN-ə çatacaq. /APA/