Sosial

Ana səhifə

Sosial

UNİSEF Bakıda uşaqların sosial müdafiəsi tədbirlərinə həsr olunmuş konfransın keçirilməsini təklif edir

14 mart 2007 08:56 (UTC +04:00)

Azərbaycanın iqtisadi inkişaf naziri Heydər Babayev Bakıda səfərdə olan BMT-nin Uşaq Fondunun (UNİSEF) Mərkəzi və Şərqi Avropa, MDB və Baltikyani ölkələr üzrə Regional ofisinin direktoru Mariya Kalivislə görüşüb. İqtisadi İnkişaf Nazirliyinin mətbuat xidmətindən APA-Economics-ə verilən məlumata görə, H.Babayev Azərbaycanın iqtisadi potensialının güclənməsinin ölkədə uşaqlara qayğı və diqqətin daha da artırılmasına imkan yaratdığını deyib. Cari ildə dövlət büdcəsinin 37,9%-i və ya 2,2 mlrd. manatının sosial yönümlü xərclərin maliyyələşdirilməsinə yönəldiləcəyini qeyd edən nazirin sözlərinə görə, bu, ötən illə müqayisədə 47% çoxdur. Bu il büdcədən əhalinin aztəminatlı təbəqəsi üçün nəzərdə tutulan ünvanlı dövlət sosial yardımlarının həcmi 80 mln. manata çatdırılıb, 2007-ci ildən etibarən əhalinin sosial cəhətdən ehtiyacı olan təbəqələrinin həyat səviyyəsinin yaxşılaşdırılması məqsədilə bir sıra müavinətlərin məbləği artırılıb. Uşaqları da əhatə edən bu cür sosial müdafiə tədbirləri davam etdirilir.
H.Babayev həmçinin bildirib ki, Azərbaycan 1992-ci ildən “Uşaqların hüquqlarının qorunması haqqında” Konvensiyaya qoşulub və ölkənin bu Konvensiya üzrə öhdəliklərini yerinə yetirməsi barədə ötən ilki hesabatı müsbət qiymətləndirilib. Ölkəmizdə ailə, qadın və uşaq problemlərinin həllinə böyük diqqət yetirildiyini bildirən nazir Azərbaycanda BMT və onun qurumları ilə əməkdaşlığa xüsusi önəm verildiyini, UNİSEF-in ölkəmizdə uşaq problemlərinin həlli ilə əlaqədar gördüyü işlərin yüksək qiymətləndirildiyini qeyd edib.
Azərbaycana səfərinin məqsədinin uşaqların səhiyyə, təhsil xidmətləri ilə əhatə olunması və sosial müdafiəsi məsələlərinin müzakirəsi olduğunu bildirən M.Kalivis isə respublikanın sosial-iqtisadi inkişafından, uşaqlara göstərilən qayğıdan məmnunluğunu ifadə edib, təmsil etdiyi təşkilatın həyata keçirdiyi layihələr barədə məlumat verib.
Görüşdə uşaqların müdafiəsinin iqtisadi aspektləri və Minilliyin İnkişaf Məqsədləri çərçivəsində onların iqtisadi, sosial və mədəni hüquqlarının müdafiəsi sahəsində görülən işlərin gedişi, büdcə ayırmaların uşaqların sosial müdafiəsinin gücləndirilməsinə real təsiri məsələləri müzakirə edilib. UNİSEF nümayəndəsinin Bakıda uşaqların sosial müdafiəsi tədbirlərinə həsr olunmuş konfransın keçirilməsi barədə təklifi razılıqla qarşılanıb.
Görüşdə UNİSEF-in Azərbaycandakı nümayəndəsi Haana Singer də iştirak edib. /APA-Economics/