Sosial

Ana səhifə

Sosial

Azərbaycanın iqtisadi inkişaf naziri BMT Baş Katibinin məcburi köçkünlərin insan hüquqları üzrə nümayəndəsini qəbul edib

03 aprel 2007 15:35 (UTC +04:00)

Bu gün Azərbaycanın iqtisadi inkişaf naziri Heydər Babayev Bakıda səfərdə olan BMT Baş Katibinin məcburi köçkünlərin insan hüquqları üzrə nümayəndəsi Valter Kalinin başçılıq etdiyi nümayəndə heyətini qəbul edib. Nazirlikdən “APA-Economics”ə verilən məlumata görə, nazir Ermənistanın Azərbaycana təcavüzü nəticəsində torpaqların 20%-nin işğal olunduğunu, 1 mln-dan artıq soydaşımızın qaçqın və köçkün olduğunu, milli iqtisadiyyata külli miqdarda zərər vurulduğunu qeyd edib. Lakin ölkə iqtisadiyyatı gücləndikcə, dövlət qaçqın və məcburi köçkünlərə qayğısını artırır.
H.Babayev Azərbaycanda son illərdə qaçqın və məcburi köçkünlərin problemlərinin həlli istiqamətində görülən işlər barədə qonaqlara məlumat verib. Belə ki, bu ilin sonunadək qaçqın şəhərciklərinin ləğv olunması prosesi başa çatdırılacaq, onlar yeni qəsəbələrə köçürüləcək. Bu qəsəbələrdə müxtəlif sahələrdə, xüsusilə kənd təsərrüfatı sahəsində yeni iş yerlərinin yaradılması nəzərdə tutulur. Həmçinin, qaçqın və məcburi köçkünlər üçün yeni qəsəbələr salınır, onlar müvafiq infrastrukturla təmin olunur, qaçqınların burada işlə təmin olunması üçün tədbirlər görülür, onlara torpaq sahələri ayrılır, lizinq yolu ilə texnika verilir, güzəştli şərtlərlə gübrə, kreditlər verilir. Gələcəkdə nəzərdə tutulan tədbirlərdən biri də yeni qəsəbələr yaxınlığında emal müəssisələrinin yaradılmasıdır. Artıq hazırlanması başa çatdırılmış və 10 ili əhatə edəcək Yoxsulluğun azaldılması və davamlı inkişaf Dövlət Proqramında da qaçqınların sosial-iqtisadi vəziyyətinin yaxşılaşdırılması barədə bir sıra tədbirlər nəzərdə tutulub.
V.Kalin isə öz növbəsində aprelin 2-də ölkə prezidenti İlham Əliyevlə görüşdüyünü xatırladaraq, qaçqın və məcburi köçkünlərin vəziyyətinin yaxşılaşdırılması istıqamətində görülmüş işlərdən məmnunluğunu bildirib. Qonaq qaçqın və məçburi köçkünlərin işlə təmin edilməsi zamanı onların qaçqınlıq həyatından əvvəlki məşğuliyyətinin nəzərə alınmasının məqsədəuyğun olduğunu qeyd edib. BMT nümayəndəsi qaçqın və məcburi köçkünlərin sosial şəraitinin və iqtisadi vəziyyətinin yaxşılaşdırılması istiqamətində təmsil etdiyi təşkilatın gördüyü işlər barədə məlumat verib və bu sahədə tədbirlərin bundan sonra da davam etdiriləcyini bildirib. /APA-Economics/