Sosial

Ana səhifə

Sosial

Bakı Metropoliteni 7 və 8-ci mikrorayonlar arasında tikiləcək yeni metro stansiyasının ərazisinin tutulması ilə bağlı Binəqədi rayon Məhkəməsinə müraciət edib

17 aprel 2007 11:33 (UTC +04:00)

Bu sözləri APA-ya Bakı Metropoliteninin mətbuat xidmətinin rəhbəri Nəzakət Tarverdiyeva söyləyib. Onun sözlərinə görə, metro tunelinin keçəcəyi ərazidə çoxlu sayda qanunsuz şəxsi ticarət obyektləri və evlər inşa edilib. N. Tarverdiyeva binaların tikildiyi vaxt Bakı şəhər İcra Hakimiyyətindən sərəncam alınmadığını da deyib: “Proses dövlətin nəzarətindədir və qanunsuz tikililərin hamısı söküləcək. Çünki Bakı Metropoliteninin rəisi Tağı Əhmədov dəfələrlə obyekt sahiblərini bu barədə xəbərdar edib. Onlar və həmin əraziyə cavabdeh olan rayon rəhbərliyi buna göz yumub. Metronun tikinti meydançasında yerləşdirilmiş qaçqınlarla bağlı isə aprelin 3-də Qaçqın və Məcburi Köçkünlərlə İşi üzrə Dövlət Komitəsinə də müraciət edilib”. N. Tarverdiyeva 7-ci mikrorayon ərazisində olan qəbiristanlığın bir hissəsinin də buradan başqa yerə köçürüləcəyini qeyd edib.
Binəqədi rayon Məhkəməsinin dəftərxanasından isə APA-ya Bakı Metropoliteninin iddia ərizəsinin daxil olduğu təsdiqlənib. Məhkəmədən bildirilib ki, hələlik iş heç bir hakimin icraatına verilməyib.
Metronun bu stansiyasının tuneli üzərində yerləşən “Min bir gecə” restoranın adının çəkilməsini istəməyən inzibatçısı isə APA-ya açıqlamasında metro tikintisinin başlandığı barədə məlumatlı olduqlarını, ancaq obyektin söküləcəyi haqda onlara heç nə deyilmədiyini bildirib: “Bizə buradan köçəcəyimizi deməyiblər. Hər halda belə xəbərdarlıq iki ay öncə olmalıdır ki, restoranın avadanlıqları başqa yerə aparılsın”. Azərbaycan Beynəlxalq Universitetin prorektoru Umeyr Hüseynov isə APA-ya bildirib ki, metro tunelinin keçəcəyi yerdə təhsil müəsissəsinin futbol meydançası düşür. O, bu futbol meydançasının sökülməsində heç bir problemin olmadığını da söyləyib: “Universitetin bütün korpusları hökumət qurumları ilə razılaşdırıldıqdan sonra tikilib. Ona görə də universitetin hansısa korpusu metronun inşasına mane olmur. Yalnız futbol meydançası həmin əraziyə düşür ki, onun da sökülməsində heç bir problem yoxdur. Universitetin qarşısında metro fəaliyyət göstərsin, biz hər şeyə hazırıq”.
Qeyd edək ki, artıq dünəndən 1992-ci ildən həmin metro tikinti meydançasında yerləşdirilən 40 qaçqın ailələri buradan köçürülməsi məqsədilə Binəqədi rayon İcra Hakimiyyəti Qaçqın və Məcburi Köçkünlərlə İşi üzrə Dövlət Komitəsi ilə birgə tədbirlər görməyə başlayıb. /APA/