Sosial

Ana səhifə

Sosial

2020-ci ildə tütün 10 milyon insanın ölümünə səbəb olacaq

30 may 2007 10:10 (UTC +04:00)

Bu gün Ümumdünya Səhiyyə Təşkilatının bəyan etdiyi 31 may - Beynəlxalq Tütünsüz Günə həsr olunmuş Dəyirmi Masa keçirilib. APA-nın məlumatına görə, tədbiri Ümumdünya Səhiyyə Təşkilatı, Səhiyyə Nazirliyi, Gənclər və İdman Nazirliyi, IREX-in İnternetin İnkişafı və Təlimi Proqramı (IATP) ilə “ELS” Müstəqil Araşdırmalar Mərkəzi birgə təşkil edib. BMT İctimai İnformasiya Departamentinin Azərbaycandakı nümayəndəsi Envera Selimoviç bildirib ki, hər il dünyada tütünün yaratdığı xəstəliklərdən 5 milyona yaxın insan ölür. 2020-ci ildə isə tütün 10 milyon insanın ölümünə səbəb olacaq. Bu gün siqaret çəkən insanların yarısı - 650 milyona yaxını sonda tütündən öləcək. Ümumilikdə siqaret çəkənlərin 10%-i, gün ərzində 2 qutu tütün çəkənlərin isə 15-20%-i sonda təhlükəli şişlərdən dünyasını dəyişir. E. Selimoviçin sözlərinə görə, hər il dünyada yüz milyonlarla insan başqasının çəkdiyi siqaretin tüstüsündən əmələ gələn xəstəliklərdən vəfat edir. Tütün çəkən ailələrdə ürək-damar xəstəlikləri tütündən istifadə etməyən ailələrə nisbətən 2-20 dəfə çox olur. Ümumdünya Səhiyyə Təşkilatının (ÜST) Azərbaycandakı nümayəndəliyinin təmsilçisi Samir Mehdiyev isə bildirib ki, bu il Beynəlxalq Tütünsüz Günün mövzusu “Siqaret tüstüsündən 100 faiz azad mühit”dir. Siqaret çəkməyin artıq Azərbaycanda da aktual problem olduğunu deyən S. Mehdiyevin fikrincə, əvvəllər ölkədə kiçik yaşlı uşaqlar və qadınlar tütündən istifadə etməsə də, artıq belə hallara tez-tez rast gəlinir. Ümumdünya Səhiyyə Təşkilatının “Sağlam həyat tərzi” proqramının milli koordinatoru Azad Hacıyev əlavə edib ki, dünyada siqaret çəkənlərin sayının azaldılması üçün bir necə üsul tətbiq olunur. Narkoloq Asif Məmmədov isə siqaret çəkənləri sabahın narkomanı adlandırıb. /APA/