Sosial

Ana səhifə

Sosial

Azərbaycanda minimum əmək haqqı, işsizlik müavinəti və təqaüdlərin minimumunun artırılması prosesinin sinxronlaşdırılması təklif olunur

20 sentyabr 2007 15:28 (UTC +04:00)

Azərbaycan Əmək və Əhalinin Sosial Müdafiəsi Nazirliyinin Baş Məşğulluq İdarəsi “Məşğulluq xidməti haqqında” qanuna əlavə və dəyişikliklərin edilməsi ilə bağlı təkliflər hazırlayır.
İdarənin rəis müavini Şahbaz Xələfovun “APA-Economics”ə verdiyi məlumata görə, dəyişikliklərin aparılmasında əsas məqsəd qanunu Azərbaycanın qoşulduğu Avropa Sosial Xartiyasına uyğunlaşdırmaqdır. Təkliflərin payız sessiyasına qədər Milli Məclisə təqdim etmək nəzərdə tutulur.
Təkliflərdə nəzərdə tutulan əsas məsələlərdən biri işsizlik müavinətlərinin və peşə hazırlığı kurslarına cəlb olunan işaxtaranların təqaüdlərinin artırılması ilə bağlıdır. Müavinət və təqaüdlərin məbləğinin çox az olduğunu qeyd edən Ş.Xələfov bildirib ki, nazirlik dövlət başçısı minimum əmək haqqının artırılması barədə fərman verən zaman bu artımın müavinətlərin və təqaüdlərin minimum həddinin artmasına da təsir göstərməsi üçün qanunvericilikdə müvafiq dəyişikliklərin olunmasını təklif edir. Bu təklif bəyənilərsə, minimum əmək haqqı ilə paralel müavinət və təqaüdlərin də minimumu artacaq. Müavinətlərin maksimum həddi isə əmək haqqından asılıdır.
Ş.Xələfov bildirib ki, hazırda respublikada minimum işsizlik müavinətinin məbləği 24 manat, peşə hazırlığı kurslarına cəlb olunan işaxtaranların təqaüdlərinin məbləği isə 12 manatdır. Müavinətlər işsizlərə 6 ay, təqaüdlər isə 3 ay müddətinə verilir. Bu ilin yanvar-avqust ayları ərzində respublikada 2646 nəfərə işsizlik statusu verilib, 3261 nəfərə müavinət təyin edilib. /APA-Economics/