Bakı. Ramil Məmmədli – APA. Nüvə Sınaqlarının Hərtərəfli Qadağan Olunması Haqqında Müqavilə Təşkilatının (CTBTO) Azərbaycan Milli Məlumat Mərkəzinin elmi-texniki bazası gücləndirilir.
Azərbaycan Milli Elmlər Akademiyası (AMEA) Rəyasət Heyəti Mərkəzi Aparatının İctimaiyyətlə əlaqələr şöbəsindən APA-ya verilən məlumata görə, Mərkəz rəhbərinin müavini, geologiya-mineralogiya elmləri namizədi, dosent Qulam Babayev bildirib ki, AMEA-nın Geologiya İnstitutunda yerləşən CTBTO-nun Azərbaycan Milli Məlumat Mərkəzinə ABŞ istehsalı olan “Lenovo Thinkstation” və “IBM” markalı avadanlıqlar sistemi alınıb. Yeni elektron sistemin mərkəzdə geofiziki məlumatların təhlili üçün imkanları genişləndirəcək. Bu isə CTBTO-nun Avstriyanın Paytaxtı Vyanada yerləşən mərkəzi ofisi ilə əlaqəni texniki baxımdan daha da sürətləndirəcək.
O deyib ki, yeni sistemin dəyəri 24 min avrodan çoxdur: “Hazırda sistem CTBTO-nun mərkəzi ofisinin mütəxəssisi Dale Roblin tərəfindən quraşdırılır. Sistemin quraşdırılması mərhələ şəkilində həyata keçirilir, beynəlxalq şəbəkəyə bağlantısı yaxın ayda CTBTO-nun digər qrupu tərəfindən təmin ediləcək”.
Qeyd edək ki, 2003-cü ildə yaradılan Azərbaycan Milli Məlumat Mərkəzinin rəhbəri AMEA-nın müxbir üzvü, professor Fəxrəddin Qədirovdur
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
