Bakı – APA. Azərbaycan prezidenti İlham Əliyev Bosniya və Herseqovinanın Rəyasət Heyətinin üzvü Mladen İvaniçi qəbul edib.
APA-nın məlumatına görə, M. İvaniç ölkəmizə əvvəlki səfərlərini, Bakıda birinci Avropa Oyunlarının açılış mərasimində iştirakını və İ. Əliyevlə keçirdikləri görüşləri xatırlayıb.
IV Qlobal Bakı Forumunda iştirakından məmnunluğunu ifadə edən M. İvaniç hazırda bütün dünya ölkələrinin tamamilə yeni çağırışlarla üzləşdiyini, tədbirin bu məsələləri müzakirə etmək üçün yaxşı fürsət yaratdığını qeyd edib.
M. İvaniçlə görüşlərini xatırlayan dövlət başçısı bu səfərlərin əməkdaşlığımızın yaxşı göstəricisi olduğunu vurğulayıb. IV Qlobal Bakı Forumunun beynəlxalq əhəmiyyətinin hər il daha da artdığını deyən prezident İlham Əliyev tədbirin ümumi maraq doğuran bir çox məsələlərin müzakirəsi baxımından önəmini qeyd edib.
Görüşdə ölkələrimiz arasında bir sıra sahələrdə əməkdaşlığa dair məsələlər ətrafında fikir mübadiləsi aparılıb.
Azərbaycan prezidenti həmçinin makedoniyalı həmkarı George İvanovla görüşüb. Görüşdə G. İvanovun ölkəmizə səfərinin Azərbaycanla Makedoniya arasında ikitərəfli əlaqələrin müzakirəsi üçün yaxşı imkan yaratdığı bildirilib.
Söhbət zamanı Nizami Gəncəvi Beynəlxalq Mərkəzinin rolunun mühüm əhəmiyyət daşıdığı vurğulanaraq, IV Qlobal Bakı Forumunun artıq dünya əhəmiyyətli aparıcı tədbirlərdən birinə çevrildiyi məmnunluqla qeyd olunub. Forumun proqramının geniş sahələri əhatə etdiyi, siyasi, iqtisadi, enerji, təhlükəsizlik və dünyanın diqqət mərkəzində olan digər məsələlərin müzakirəsi baxımından əhəmiyyətli olduğu bildirilib. Görüşdə, həmçinin iki ölkə arasında dostluq və əməkdaşlıq əlaqələrinin müxtəlif sahələrdə, o cümlədən energetika sektorunda hazırkı vəziyyəti və perspektivləri ətrafında fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
