Top oyunları

Ana səhifə

Top oyunları

II Avropa Oyunlarının antidopinq proqramı açıqlanıb

01 mart 2019 10:00 (UTC +04:00)

Belarusun paytaxtı Minskdə keçiriləcək II Avropa Oyunlarının antidopinq proqramı açıqlanıb. ONA-nın məlumatına görə, yarış zamanı dopinq nəzarət məntəqələri bütün idman qurğuları və İdmançılar Kəndində fəaliyyət göstərəcək.
Testlər ümumilikdə bütün idman növlərində aparılacaq. Üç növ istisna olmaqla, digərlərində qanda dopinqin yoxlanılması da nəzərdə tutulub. Bunlar kamandan oxatma, güllə atıcılığı və stend atıcılığıdır. Avropa Olimpiya Komitəsinin (AOK) tələbi ilə testlər Avstriyadakı laboratoriyada yoxlanılacaq.
Dopinq testə məruz qalacaq idmançıların ümumi və növlər üzrə sayı AOK-un istəyi ilə açıqlanmır.
Mükafatçılar sırasında düşən bütün atletlər bu yoxlanışdan keçməli olacaq. Həmçinin püşkə əsasən də dopinq testlər aparılacaq. Ümumdünya Dopinq Agentliyi (WADA) və federasiyaların istəyi ilə bəzi idmançıların da yoxlamaya məruz qalması mümkündür. Eyni zamanda, qadağan olunmuş maddələrdən istifadə ehtimalı yüksək olan növlər də müəyyənləşib. Bunlar atletika, velosiped idmanı, güləş, sambo, cüdo, kanoe və kayaklarda avarçəkmədir.
Qeyd edək ki, II Avropa Oyunları iyunun 21-dən 30-dək keçiriləcək.