Ordu

Bakı-APA. Cəbhədə düşmənin hücumunun qarşısını alarkən şəhid olan müddətdən artıq qulluqda olan, çavuş 23 yaşlı Əsgərov Təbriz Hamlet oğlu anadan olduğu Şəmkir rayonunun Morul kəndində dəfn edilib.

APA-nın qərb bürosunun verdiyi məlumata görə, şəhidin dəfnində böyük izdiham yaşanıb.

Mərasimdə Rayon İcra Hakimiyyətinin başçısı Alimpaşa Məmmədov, Səfərbərlik və Hərbi Xidmətə Çağırış üzrə Dövlət Xidmətinin rəis müavini Novruzəli Orucov, Müdafiə Nazirliyinin idarə rəisi, general Rasim Əliyev, millət vəkilləri Sona Əliyeva və Sahibə Qafarova və ictimaiyyət nümayəndələri iştirak ediblər. Şəhidin atası Hamlet Əsgərov övladının Vətən uğrunda şəhid olmasından qürur duyduğunu deyib.

Şəhidin tabutuna çəkilən Azərbaycan bayrağı atasına təqdim olunub. Dövlət himninin sədaları altında yaylım atəşi atılıb və şəhid torpağa tapşırılıb.

Qoşunların təmas xəttində şəhid olmuş Azərbaycan Ordusunun əsgəri Bağırov Emin İmran oğlu isə Binəqədi rayonunda dəfn edilib.

Binəqədi rayon İcra Hakimiyyətindən APA-ya verilən məlumata görə, mərasimdə Binəqədi rayon İcra Hakimiyyətinin başçısı Xaləddin İsgəndərov, Milli Məclisin deputatları Azay Quliyev və Madər Musayev, Müdafiə Nazirliyinin nümayəndələri, Səfərbərlik və Hərbi Xidmətə Çağırış üzrə Binəqədi rayon İdarəsinin rəisi Mehman Qurbanov, rayonun hüquq-mühafizə orqanlarının nümayəndələri də iştirak edib.

Şəhid Bağırov Emin İmran oğlu 6 aprel tarixində Binəqədi qəsəbəsində dəfn edilmişdir.

Dəfn mərasimində “Şəhidlər ölməz, Vətən bölünməz!”, “Vətən sənə canım fəda!” şüarları səsləndirilib. Cənazə namazı qılındıqdan sonra şəhidin ruhuna dualar oxunub, Allahdan rəhmət dilənib.

Şəhid Emin İmran oğlu Bağırov Binəqədi qəsəbə qəbiristanlığında Azərbaycan Respublikasının Dövlət Himninin sədaları altında, yaylım atəşinin açılması ilə torpağa tapşırılıb.

Daha sonra şəhid cənazəsinə bükülmüş Azərbaycan bayrağı şəhidin atasına təhvil təqdim olunub.

***

17.00

Lənkəran. Ağəddin Babayev – APA. Ermənilərlə döyüşdə şəhid olan əsgər, 1997-ci il təvəllüdlü Əlizaman Fərrux oğlu İslamov bu gün doğulduğu Lənkəran rayonunun Cil kəndində torpağa tapşırılıb.

APA-nın cənub bürosunun xəbərinə görə, dəfn mərasimində Lənkəran Şəhər İcra Hakimiyyətinin, rayon hüquq-mühafizə orqanlarının rəhbərləri, ictimaiyyət nümayəndələri iştirak edib.

Şəhidin tabutuna çəkilən Azərbaycan bayrağı dayısına təqdim olunub.

Yaylım atəşi açılıb, şəhid əsgər torpağa tapşırılıb.

***

15:50

Şəmkir. Azər Məmmədli - APA. Düşmənlə döyüş zamanı şəhid olan polkovnik Vüqar Yusifov doğulduğu Şəmkir rayonunun Şiştəpə kəndində torpağa tapşırılıb.

APA-nın qərb bürosunun verdiyi məlumata görə, 40 yaşlı polkovnik Vüqar Yusifov dəfn mərasiminə toplaşanlar zabitin keçdiyi ömür yolundan, orduya bağlılığından söz açıblar. Böyük izdiham yaşanan mərasimdə şəhid Vüqar Yusifovun əsl vətənpərvər, qorxmaz, cəsur və yüksək nizam intizamlı bir zabit kimi daim yaddaşlarda yaşayacağı vurğulanıb.

Şəmkir rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin nümayəndələri, zabitin xidmət etdiyi hərbi hissənin hərbçiləri və döyüş yoldaşları və minlərlə sakinin iştirak etdiyi mərasimdə "Vətən sağ olsun!", "Şəhidlər ölməz, Vətən bölünməz!" şüarları səsləndirilib.

Mərasimdə tabuta çəkilən Azərbaycan bayrağı şəhidin atasına təqdim olunub. Daha sonra dövlət himninin sədaları altında yaylım atəşi açılıb və şəhid zabitimiz torpağa tapşırılıb.

Qeyd edək ki, Vüqar Yusifov 3 uşaq atası olub.

***

14.42

Qəbələ. Elvin Yaqubov - APA. Azərbaycan ordusunun şəhid olan zabiti, 1992-ci il təvəllüdlü Şirinov Sahil Həsrət oğlu aprelin 6-da doğulduğu Qəbələ rayonunda dəfn edilib.

APA-nın yerli bürosunun xəbərinə görə, şəhid Sahil Şirinov Qəbələ rayonunun Bum qəsəbəsindəki məzarlıqda torpağa tapşırılıb, şəhidin ruhuna dualar oxunub.

Dəfn mərasimində Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin nümayəndələri, Qəbələ Rayon İcra Hakimiyyətinin, rayon hüquq-mühafizə orqanlarının, idarə və təşkilatların kollektivi, minlərlə rayon sakini ilə yanaşı şəhidin qulluq etdiyi hərbi hissənin əsgər və zabitləri də iştirak ediblər. Mərasimdə çıxış edənlər qüdrətli Azərbaycan ordusunun düşmənə hər an tutarlı cavab verməyə hazır olduğunu, şəhidlərimizin qanının yerdə qalmayacağını, Prezident, Ali Baş Komandan İlham Əliyevin ətrafında sıx birləşərək onun əmrini gözlədiklərini bildiriblər.

Dəfn mərasimində “Şəhidlər ölməz, Vətən bölünməz!” şüarı səsləndirilib, şəhid əsgər yaylım atəşləri altında son mənzilə yola salınıb. Şəhidin tabutuna bükülmüş Azərbaycan bayrağı atasına təqdim edilib.

Qeyd edək ki, Azərbaycan Ordusunun hərbi qulluqçusu, şəhid leytenant Sahil Şirinov Heydər Əliyev adına Azərbaycan Ali Hərbi Məktəbin məzunu olub.

Sahil Şirinov nişanlı olub, toy mərasiminə hazırlaşırmış.

Mərasimdə Zaman Şirinov şəhid qardaşı Sahil ilə fəxr etdiyini bildirib. O, Vətən uğrunda canlarından keçən bütün şəhidlərə Allahdan rəhmət diləyib.