Hadisə

Ana səhifə

Hadisə

Baş həkim Ağcabədidə 6 yaşlı uşağın zəhərlənmədən ölmədiyini açıqlayıb - YENİLƏNİB-1

Baş həkim Ağcabədidə 6 yaşlı uşağın zəhərlənmədən ölmədiyini açıqlayıb - <span style="color: red;">YENİLƏNİB-1

14 noyabr 2016 14:29 (UTC +04:00)

“Ağcabədi rayon sakini 6 yaşlı Elton Şirinov qida zəhərlənməsində deyil, ağ ciyər çatışmazlığından vəfat edib”.

Bunu APA-nın Qarabağ bürosuna Ağcabədi rayon Uşaq Xəstəxanasının baş həkimi Rəfiqə Şirinova deyib: “Düzdür, uşaqla bağlı bizə müraciət olunmuşdu. Amma müraciət edərkən uşağın vəziyyəti çox ağır idi. Növbədə olan həkim cərraha ehtiyac duyduğu üçün onu cərrahiyyə şöbəsinə göndərmişdi. Cərrahiyyə şöbəsində uşağa tənəffüs çatışmazlığı diaqnozu qoyulub. Ağcabədi rayon Xəstəxanasında uşaq cərrahiyyəsi şöbəsi olmadığı üçün uşaq Bərdə Uşaq Cərrahiyyəsi Mərkəzinə göndərilmişdi”.

Baş həkim deyib ki, yaxınları uşağın pomidor turşusundan zəhərlənərək öldüyünü desələr də, götürülən nümunələr bunu təsdiq etməyib: “Bizim fikrimizə görə, uşaq ağ ciyər çatışmazlığından vəfat edib“.

6 yaşlı Elton Şirinovun babası Əsgər Məmmədov APA-ya nəvəsinin həkim laqeydliyindən öldüyünü deyib. Ə. Məmmədov faktla bağlı həkimlərdən şikayətlərinin olmadığını da açıqlayıb.

***

13:29

Ağcabədidə 6 yaşlı uşağın qidadan zəhərlənərək ölməsi ilə bağlı bəzi təfərrüatlar məlum olub.

Rayon Prokurorluğundan APA-nın Qarabağ bürosuna verilən məlumata görə, 2010-cu il təvəllüdlü Elton Şirinov ölümündən 3 gün əvvəl anası ilə birgə həbsdə olan atasının yanına gedib.

Görüşə gedən ailə özü ilə ev şəraitində bağlanmış pomidor turşusu aparıb. Onlar görüş zamanı birgə yemək yeyiblər.

Uşağın əmisi Allahverdi Şirinov, APA-ya bildirib ki, görüşdən qayıtdıqdan sonra E. Şirinovun səhhətində problem yaranıb: “Dərhal kənd həkiminə müraciət elədik. Həkim sistem köçürdü. Axşamüstü Eltonun vəziyyəti daha da ağırlaşdı. Apardıq Ağcabədi Mərkəzi Rayon Xəstəxanasına. Orda həkimlərdən biri dedi ki, uşağın bağırsağında zəhərlənmə var, aparın Bərdə Mərkəzi Rayon Xəstəxanasına. Bərdədə həkimlər dedi ki, çox gecikdirmisiniz, qəbul edə bilmərik. Onlar da Mingəçevir xəstəxanasına aparmağımızı istədilər. Bərdədən çıxıb Mingəçevirə gedirdik, Yevlaxa çatanda uşaq yolda keçindi”.

Faktla bağlı Ağcabədi Rayon Prokurorluğunda cinayət işi açılıb, araşdırma aparılır.

***

12:03

Acabədidə 6 yaşlı uşaq qidadan zəhərlənib.

Rayon Polis Şöbəsindən APA-ya verilən məlumata görə, hadisə rayonun Kürdlər kəndində qeydə alınıb. Kənd sakini, 6 yaşlı Elton Şirinov evlərində pomidor turşusundan zəhərlənərək ölüb.

Hafiz Heydərov, Habil Məmmədov