Bakı. Mübariz Aslanov – APA. Milli Məclisin sədri Oqtay Əsədov Bakıda səfərdə olan Türkiyə Böyük Millət Məclisinin sədri İsmayıl Kahramanın başçılıq etdiyi nümayəndə heyəti ilə görüşüb.
MM-dən APA-ya verilən məlumata görə, sədr qonaqları səmimi salamlayaraq İ. Kahramanı 27-ci çağırış Türkiyə Böyük Millət Məclisinin sədri seçilməsi münasibətilə təbrik edib. O xatırladıb ki, Türkiyədəki seçkilərdən sonra bu ölkənin rəsmiləri ilk səfərlərini məhz Azərbaycana edirlər: “Ümidvaram ki, başqa dövlətlər üçün nümunə olacaq bu münasibətlər və bu ənənə gələcəkdə də qorunub saxlanacaq, daha da inkişaf etdiriləcək”.
O. Əsədov regionda yaranmış son vəziyyətlə əlaqədar fikirlərini açıqlayaraq Rusiya ilə Türkiyə arasında münasibətlərin tezliklə normallaşacağına inamını ifadə edib və bunun üçün Azərbaycan tərəfinin hər cür köməklik etməyə hazır olduğunu söyləyib. MM sədri Dağlıq Qarabağ münaqişəsinin həllində Türkiyənin tutduğu prinsipial mövqeyə görə bir daha minnətdarlığını bildirib”.
İ. Kahraman isə Türkiyə-Azərbaycan münasibətlərinin bugünkü vəziyyəti və gələcək inkişaf perspektivlərindən danışaraq, nümayəndə heyətlərinin beynəlxalq qurumlarda da strateji tərəfdaş kimi ortaq mövqedən çıxış etmələrini yüksək dəyərləndirib. O, Azərbaycanın ən ağrılı problemi olan Dağlıq Qarabağ münaqişəsinin həllində Türkiyənin hər zaman Azərbaycanın yanında olduğunu vurğulayaraq, problemin sülh yolu ilə tezliklə həllinə inandığını ifadə edib. İ. Kahraman son dövrdə regionda yaranmış mürəkkəb bir dönəmdə Azərbaycanın tutduğu mövqeyə və hadisələrə həssaslıqla yanaşmasına görə minnətdarlığını bildirib.
Söhbətdə tərəfləri maraqlandıran məsələlər ətrafında fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
