Bakı. Aqşin Rafiqoğlu - APA-Economics. Rusiyalı milyarder Mixail Qutseriyev və onun ailəsinə məxsus olan "RussNeft" şirkəti Moskva birjasında IPO keçirmək niyyətindədir.
"APA-Economics" xəbər verir ki, bu barədə "RussNeft"in səhmdarı və "BinBank"ın Direktorlar Şurasının sədri Mikail Şişxanov (Mixail Qutseriyevin bacısı oğlu) deyib.
Onun sözlərinə görə, "RussNeft" birjada 25-49% səhmini yerləşdirməyi planlaşdırır. "Əqd artıq 2016-cı ilin IV rübündə baş tuta bilər", - deyə o bildirib.
Hazırda "RussNeft"in səhmlərinin 54%-i M. Qutseriyev və onun ailə üzvlərinə, qalan 46% isə İsveçrənin "Glencore" şirkətinə məxsusdur. "IPO-dan sonra səhmdarların pay bölgüsü barədə danışmaq hələ tezdir. Bu, əqdin parametrlərindən asılı olacaq. Bir şey dəqiqdir ki, Qutseriyev və onun ailəsi majoritar səhmdar kimi qalacaqlar", - deyə M. Şişxanov qeyd edib.
M. Şişxanov qiymət səsləndirməsə də, bildirib ki, MDB-dən olan investor 1 mlrd. dollar yatırım etməyə hazırdır. İnvestorun adı da açıqlanmır.
O, əlavə edib ki, İPO-dan öncə M. Qutseriyevin "Global Energy" şirkətinə məxsus Azərbaycandakı neft əraziləri "RussNeft"in balansına keçiriləcək. M. Qutseriyev "Global Energy" şirkətini 2007-ci ildə yaradıb. Bundan başqa, M. Şişxanov qeyd edib ki, "Global Energy" şirkətinin Qazaxıstandakı aktivləri də "RussNeft"ə köçürülə bilər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
