Bakı. Cavid Zeynallı – APA. Gürcüstanın Turizm üzrə Milli Administrasiyasının rəhbəri Giorgi Çoqovadzenin rəhbərlik edəcəyi nümayəndə heyəti Azərbaycana səfər edəcək. Mədəniyyət və Turizm Nazirliyinin informasiya və ictimaiyyətlə əlaqələr şöbəsindən APA-ya verilən məlumata görə, sentyabrın 6-dan 9-dək baş tutacaq səfərdə Azərbaycanla Gürcüstan arasında turizm sahəsində əməkdaşlığın genişləndirilməsi və ikitərəfli görüşlərin keçirilməsi müzakirə olunacaq.
Səfər çərçivəsində qonaqların Mədəniyyət və Turizm Nazirliyində, Azərbaycan Turizm Assosiasiyasında, Azərbaycan Konqreslər Bürosunda ikitərəfli görüşlər keçirilməsi nəzərdə tutulub.
Qonaqlar Heydər Əliyev Mərkəzi, Şirvanşahlar Sarayı, Xalça muzeyi, Qız Qalası və Qobustan Milli Tarix Bədii Qoruğu ilə tanış olmaq imkanı əldə edəcəklər.
Səfərin həyata keçirilməsində əsas məqsəd iki ölkə arasında işgüzar turizm sahəsində təcrübə mübadiləsinin həyata keçirilməsi, MDB məkanında ilk dəfə olaraq 2013-cü ildə ölkəmizdə təsis edilmiş Azərbaycan Konqreslər Bürosunun təcrübəsindən istifadənin öyrənilməsidir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
