Xarici siyasət

Ana səhifə

Xarici siyasət

Azərbaycan və Türkiyə prezidentləri mətbuat üçün bəyanatlarla çıxış ediblər

10 sentyabr 2008 22:14 (UTC +04:00)

“Bizim münasibətlərimiz çox yüksək səviyyədədir. Dövlət və hökumət başçılarının qarşılıqlı səfərləri, çox fəal əlaqələrimiz, əlbəttə ki, bölgədə gedən proseslərə operativ reaksiya vermək imkanlarını da genişləndirir. İkitərəfli müstəvidə birgə çoxlu layihələr icra olunur. Türkiyə və Azərbaycanı birləşdirən enerji və nəqliyyat dəhlizləri çox uğurla fəaliyyət göstərir. Bütün bunlar bizim birgə səylərimiz nəticəsində baş vermiş uğurlu hadisələrdir”.

Bakı-Tbilisi-Ceyhan, Bakı-Tbilisi-Ərzurum neft-qaz kəmərlərinin istismarı nəticəsində hər iki ölkənin iqtisadi və siyasi maraqlarını daha da böyük dərəcədə təmin etdiyini deyən prezident nəqliyyat sektorunda atılan addımların da uğurlu olduğunu vurğulayıb: “Bizim bütün iqtisadi və siyasi təşəbbüslərimiz bölgədə əməkdaşlığın, sabitliyin, sülhün bərqərar olunmasına xidmət göstərir. Bu baxımdan tam əminliklə deyə bilərik ki, ümumiyyətlə, Türkiyə və Azərbaycanın siyasəti, bölgədə irəli sürülən təşəbbüslər bu gün və gələcəkdə sabitliyin daha da möhkəmlənməsinə yeni şərait yaradacaq”.

Azərbaycan prezidenti deyib ki, Abdulla Güllə ikitərəfli məsələləri və bölgədə yaranmış vəziyyəti, son hadisələri müzakirə edərkən, bir daha Türkiyə ilə Azərbaycanın mövqeyinin, maraqlarının bir olduğu, hadisələrə baxışlarda fərq olmadığı ortaya çıxıb: “Bu, çox önəmlidir. Çünki, bu, həm iki ölkə arasında olan ənənəvi dostluq, qardaşlıq münasibətlərini daha da gücləndirir, digər tərəfdən, sirr deyil ki, Türkiyə və Azərbaycanın bölgədəki rolu və təsir imkanları böyüyür. Bunun müxtəlif səbəbləri var və bu səbəblərin yaranmasında, əlbəttə ki, bizim fəaliyyətimiz də az əhəmiyyət kəsb etmir. Beləliklə, biz gələcək birgə fəaliyyət haqqında çox açıq və aydın mənzərə görürük və əminəm ki, birgə səylər nəticəsində biz bölgədə sülhün təmin olunmasını görəcəyik”.

Dağlıq Qarabağ münaqişəsinin həllinin ön plana çıxdığını vurğulayan ölkə başçısı məsələnin uzun illər həll olunmamasının həm Azərbaycan, həm də bölgə üçün böyük təhlükə mənbəyi olduğunu qeyd edib: “Biz məsələnin tezliklə və beynəlxalq hüquq normaları əsasında həllini tapmasını istəyirik. Azərbaycan bütün beynəlxalq təşkilatlarda öz mövqeyini açıq-aydın ortaya qoyur”.

BMT-nin və digər beynəlxalq təşkilatların Dağlıq Qarabağla bağlı mövqeyini xatırladan dövlət başçısı bu işğala son qoyulmasını istədiyimizi bir daha söyləyib. İ. Əliyev vurğulayıb ki, Azərbaycan məhz sülh prosesinə sadiq olduğu üçün 15 ildən çox nəticəsiz danışıqlar davam etdiyi halda yenə də prosesi davam etdirir: “Bu məsələnin həlli yalnız beynəlxalq hüquq norma və prinsiplərə əsaslanmalıdır. Azərbaycanın ərazi bütövlüyü bərpa olunmalıdır, Ermənistanın silahlı qüvvələri işğal olunmuş bütün torpaqlardan çıxarılmalıdır, Azərbaycanın 1 milyon qaçqını və məcburi köçkünü öz doğma torpağına qayıtmalıdır. Əgər biz buna nail olsaq, bölgədə tam yeni vəziyyət yaranacaq: işbirliyi, sabitlik, yeni iqtisadi və siyasi təşəbbüslər, kommunikasiyaların açılması. Bir sözlə, bölgədə həm sülh təmin olunacaq, həm də inkişaf daha da sürətlə gedəcək”.

Prezident deyib ki, bu gün Türkiyə və Azərbaycanın iqtisadiyyatları o qədər möhkəmdir ki, bu uğurlu inkişafa heç nə təsir edə bilməz: “ Ancaq əgər biz Ermənistan-Azərbaycan, Dağlıq Qarabağ münaqişəsini həll edə bilsək, - mən buna ümid edirəm, - əlbəttə ki, bütün ölkələrin inkişafı daha da sürətli olacaq. Hər bir ölkə bundan faydalanacaq. Biz bunu istəyirik. Biz istəyirik ki, bölgədə sülh olsun, əmin-amanlıq olsun və bölgədəki bütün ölkələr bir-biri ilə normal münasibətlər yarada bilsinlər. Yenə də deyirəm, bunu etmək üçün, sadəcə olaraq, Ermənistanın siyasi rəhbərliyinin iradəsi və müdrik addımları lazımdır”.

Prezident deyib ki, o və türkiyəli həmkarı Ermənistanın yeni rəhbərliyinin məsələnin həlli üçün öz səylərini göstərməyə davam edəcəyi fikrindədirlər: “Müəyyən ümidverici amillər və məlumatlar var. Əlbəttə ki, hadisələri qabaqlamaq istəməzdim, ancaq biz gələcəyə artan ümidlərlə baxırıq. İnanmaq istəyirəm ki, həm Türkiyənin, həm Azərbaycanın, həm Ermənistanın və digər ölkələrin səyləri nəticəsində biz bölgədə sülhün təmin edilməsinə nail olacağıq”.

Öz növbəsində Türkiyə prezidenti Abdulla Gül ikitərəfli və regional məsələləri müzakirə etdiklərini, ölkələrimiz arasındakı münasibətlərin bütün sahələrdə mükəmməl şəkildə irəlilədiyini vurğulayıb. O deyib ki, Türkiyə siyasi məsələlərdə daim Azərbaycanın yanında olub, olmağa da davam edəcək.

Türkiyə prezidenti Azərbaycan və Ermənistan arasındakı Dağlıq Qarabağ probleminin dialoq yolu ilə, anlaşma və danışıqlar vasitəsilə həllinə ümid etdiklərini deyib: “Biz 17 ildir ki, davam edən bu problemin həlli üçün yeni fürsətlər yarandığı qənaətindəyik. Bu məsələ ilə bağlı Ermənistana səfərdən də ümidli dönmüşəm. Bu məsələnin danışıqlarla həll oluna biləcəyinə inanıram. Bu problemin həlli bölgəyə sülh havası gətirər ki, bu da bütün regionda böyük iqtisadi əməkdaşlıq qurulması demək olar. Neft kəmərləri, dəmir yolları bütün Qafqazda şəbəkə yarada bilər. Ona görə də bu yeni fürsəti ən yaxşı formada dəyərləndirmək və dondurulmuş münaqişələrin belə qalmasına imkan vermədən onları həll etmək lazımdır”.