Xarici siyasət

Ana səhifə

Xarici siyasət

Artur Lenk: “Azərbaycan dar ayaqda İsrailin arxalanacağı ölkədir”

18 sentyabr 2008 13:31 (UTC +04:00)

Bakı. Laçın Sultanova-APA. İsrailin Azərbaycandakı fövqəladə və səlahiyyətli səfiri Artur Lenk ‘Women’s Media Watch” Azərbaycan Qadın Jurnalistlər Birliyinin üzvləri ilə görüşüb. APA-nın məlumatına görə, Azərbaycan-İsrail münasibətlərinin əhəmiyyətindən danışan səfir bu əlaqələrin 5 əsas maraq üzərində qurulduğunu deyib. Bu maraqlar Azərbaycanda yaşayan yəhudi icması və İsraildə yaşayan azərbaycanlıların rifahı, enerji sahəsində əməkdaşlıq, strateji əməkdaşlıq, ticarət mübadiləsi və əhalisinin əksəriyyəti müsəlman olan Azərbaycanla əhalisinin əksəriyyəti yəhudi olan İsrail arasında olan dostluq əlaqələrindən ibarətdir.

Səfir bu dostluğun dünyaya bir mesaj olduğunu deyib: “Bizim bu qədər müxtəlif, eyni zamanda hər iki dövlətin maraqlarına xidmət edən məsələlərdə əməkdaşlıq etməyimiz müsəlman dünyası ilə Qərb arasında guya toqquşma, ziddiyyət olmasına dair mülahizələrin yanlış olduğunu sübut edir. Ölkələr arasında razılaşmamaq üçün müxtəlif səbəblər ola bilər, lakin islam, yəhudilik və xristianlıq səbəb deyil”. Ölkələrimiz arasında strateji əlaqələrə toxunan səfir Lenk İsraillə Azərbaycanın kiçik ölkələr olduğunu və mürəkkəb regionda yerləşdiyini vurğulayıb: “Diplomatik dildə bu, o deməkdir ki, bizim hər ikimizin “dəlı qonşuları” vardır. Biz elə bu bölgədə baş verən son hadisələrdə gördüyümüz kimi, kiçik ölkələr mürəkkəb qonşuluqla olanda çox ehtiyatlı və müdrik davranmalıdır. Həm İsrail, həm Azərbaycan oxşar problemlərlə üzləşir. Bu yaxınlarda “Əbu Bəkr” məscidinə terror hücumu baş verəndə İsrail Azərbaycanın vəziyyətini daha yaxşı hiss edən ölkələrdən oldu”.

İsrailli diplomatının sözlərinə görə, Gürcüstan-Rusiya münaqişəsinin əvvəlində Gürcüstanda olan 500-600 İsrail vətəndaşının təhlükəsizliyi ilə bağlı narahatlıq yaşananda, Azərbaycanın yardım əlini uzatması İsrail rəhbərliyini çox təsirləndirib: “Avqustun 10-11-də Tiflis aeroportu bağlı idi. Biz bu qədər İsrail vətəndaşını Gürcüstandan necə çıxaracağımızı düşünürdük? Digər ölkələr, Birləşmiş Ştatlar, Britaniya öz vətəndaşlarını İrəvana göndərirdilər ki, oradan təyyarə ilə vətənə qaytarsınlar. Lakin bizim Ermənistanda səfirliyimiz yoxdur. Mənim Azərbaycan Xarici İşlər Nazirliyi və Gəncə icra hakimiyyətinə etdiyim 2-3 qısa telefon zəngindən sonra bəlli oldu ki, Azərbaycan bacardığı bütün yardımı göstərəcəkdir. Gürcüstanla sərhədə göndərmək üçün avtobusların təşkilindən başlamış, İsrail təyyarələrinə Bakı və Gəncədə enməyə icazəyədək bütün şərait yaradıldı ki, həmvətənlərimiz Gürcüstanı tərk edə bilsinlər”.

Səfir Lenkin sözlərinə görə, Azərbaycan tərəfinin göstərdiyi dostluq jesti çox yüksək qiymətləndirilib: “Biz bu yardımdan istifadə etməsək də, başa düşdük ki, dar ayaqda Azərbaycan İsrailin arxalanacağı bir ölkədir. Odur ki, mən bunu Gürcüstanda münaqişə ilə bağlı öyrəndiyimiz kiçik bir ibrət dərsi hesab edirəm”.