Xarici siyasət

Ana səhifə

Xarici siyasət

Con Neqroponte: “Dağlıq Qarabağ münaqişənin həlli Azərbaycanın təhlükəsizliyinin güclənməsinə gətirib çıxaracaq”

02 oktyabr 2008 15:50 (UTC +04:00)

APA-nın xəbərinə görə, bu sözləri Azərbaycanda səfərdə olan ABŞ dövlət katibinin müavini Con Neqroponte bu gün keçirdiyi mətbuat konfransında deyib. C. Neqroponte bildirib ki,
ABŞ dövlətlər arasında olan münasibətlərin dostluq ruhunda gücləndirilməsi niyyətini yenidən təsdiqləyib: “Biz vacib maraqları paylaşırıq və müxtəlif mühüm məsələlər üzərində sıx əməkdaşlıq edirik. ABŞ və Azərbaycan regional və qlobal sabitlik sahəsində tərəfdaş kimi çalışırlar. Amerikalı və Azərbaycanlı əsgərlər İraqda, Əfqanıstanda çiyin-çiyinə xidmət edirlər. ABŞ Azərbaycanla həm təhlükəsizlik sahəsində, həm də NATO-nun Sülh Naminə Tərəfdaşlıq planı çərçivəsində əməkdaşlığı davam etdirəcək”.

ABŞ-ın Azərbaycanla enerji layihələri ilə bağlı da əməkdaşlıq etdiyini xatırladan dövlət katibinin müavini dünən Səngəçal terminalında olduğunu deyib: “Bakı-Tiflis-Ceyhan və Cənubi Qafqaz qaz kəmərlərini əhatə edən əməkdaşlığımız Türkiyə-Yunanıstan-İtaliya və “Nabucco” kəmərlərinə nəzərimizi yönəltdiyimiz vaxtda daha da dərinləşir”.

O, Rusiya ilə Gürcüstan arasında baş vermiş münaqişəyə də toxunub: “Rusiyanın Gürcüstana etdiyi müdaxiləyə bəraət qazandırmaq olmaz. Rusiyanı Fransa prezidenti Nikola Sarkozinin vasitəçiliyi ilə əldə olunan atəşkəsə tam əməl etməyə çağırırıq. Biz aydın bəyan etmişik ki, Gürcüstan, Azərbaycan və Ermənistanın ərazi bütövlü və müstəqilliyini tanıyırıq. Məhz bu şəraitdə ABŞ Dağlıq Qarabağ münaqişəsinin dinc qolla həlini həmişəkindən daha çox istəyir. Biz ərazi bütövlüyü prinsipini əsas tutan və digər beynəlxalq prinsipləri nəzərə alan münaqişənin razılaşdırılmış həllinin əldə olunmasının tərəfdarıyıq. Münaqişənin həll olunması bölgədə sülhün və sabitliyin, Azərbaycanın təhlükəsizliyinin güclənməsinə gətirib çıxaracaq”.

Azərbaycan prezidenti və xarici işlər naziri ilə danışıqlar apardığını bildirən C. Neqroponte Azərbaycanın Əfqanıstanda sülhyaratma missiyasında daha yaxından iştirak etməsini dəstəklədiklərini deyib.

Neqroponte_Azərbaycan