Xarici siyasət

Ana səhifə

Xarici siyasət

Səməd Seyidov: “AŞ PA hesab edir ki, Azərbaycan xalqı sərbəst iradə nümayiş etdirərək, öz prezidentini seçib”

02 dekabr 2008 09:36 (UTC +04:00)

Bakı. Elbrus Seyfullayev - APA. Azərbaycanın Avropa Şurası Parlament Assambleyasındakı (AŞ PA) nümayəndə heyətinin rəhbəri Səməd Seyidov bu gün Milli Məclisdə mətbuat konfransı keçirib. APA-nın xəbərinə görə, S. Seyidov AŞ Büro iclasında və AŞ PA Daimi Komitəsinin toplantılarında Azərbaycanla bağlı aparılan müzakirələr barədə danışıb. Toplantılarda Azərbaycanda keçirilən prezident seçkiləri ilə bağlı müzakirələr aparıldığını, AŞ PA-nın Azərbaycan üzrə həmməruzəçisi Andres Herkelin iclasda çıxış etdiyini deyən S. Seyidovun sözlərinə görə, həmməruzəçi Azərbaycanda keçirilən seçkilərin Avropa standartlarına cavab verdiyini qeyd edib: “Avropa Şurası Parlament Assambleyası hesab edir ki, Azərbaycan xalqı sərbəst iradə nümayiş etdirərək öz prezidentini seçib. AŞ PA-da hazırlanan məruzədə qeyd olunub ki, Azərbaycan xalqı sabitliyə və davamlılığa səs verib”.

S. Seyidov qeyd edib ki, AŞ PA-nın Daimi Komitəsində aparılan müzakirələrdə Azərbaycanda keçirilən prezident seçkilərinə beş müxalifət partiyasının qatılmamasına görə təəssüf ifadə edilib: “Hazırlanan məruzədə indiyə qədər hakimiyyətlə müxalifət arasında dialoqun keçirildiyi, bundan sonra isə müxalifətin öz arasında dialoq aparılmasının vacibliyi vurğulayıb”.

Nümayəndə heyətinin rəhbəri deyib ki, AŞ PA Müşahidə Missiyası Azərbaycandakı seçkilərin yaxşı təşkil olunduğunu, qanunvericiliyin təkmilləşdirildiyini, daha yüksək nəticələr əldə etmək üçün əməkdaşlığın davam etdirilməsinin vacibliyini qeyd edib. Missiyanın məruzəsində Azərbaycanda beş müxalifət partiyasının seçkilərə qatılmaması rəqabətin olmaması ilə əlaqələndirilib: “AŞ PA missiyası hesab edir ki, seçkiyə qatılmayanlar qələbə qazanmayacaqlarını əvvəldən biliblər və nüfuzlarını qorumaq üçün, şanslarını 2010-ci ildə keçiriləcək seçkilərə saxlamaqla siyasi manevr ediblər”.

S. Seyidov deyib ki, AŞ PA Daimi Komitəsinin qərarında Azərbaycanda keçirilən seçkilərin xalqın iradəsini əks etdirdiyi qeyd olunduğu üçün AŞ PA-nın yanvar sessiyasında Azərbaycanla bağlı müzakirələr aparılmayacaq. Nümayəndə heyətinin rəhbəri AŞ PA-nın yanvarda keçiriləcək sessiyasında yalnız Ermənistanda keçirilmiş prezident seçkiləri ilə bağlı müzakirələr açılacağını söyləyib: “Avropa Şurası Ermənistanda keçirilən seçkilərlə bağlı qətnamə qəbul edib. Amma Ermənistanda baş verən proseslər qətnamənin yerinə yetirilməsinə şərait yaratmır. Ona görə də Ermənistanla bağlı aparılan müzakirələr asan keçməyəcək”.

S. Seyidov onu da qeyd edib ki, AŞ PA sessiyasında qurumun və ATƏT-in müşahidə missiyalarının Azərbaycanda keçirilən seçkilərlə bağlı mövqelərində ortaya çıxan ziddiyyətlər müzakirə olunacaq, təhlil ediləcək: “Biz də hesab edirik ki, bu yöndə ciddi müzakirələr açılmalı, seçkilərə kölgə salmaq, nəticələr açıqlanmadan əvvəlcədən hesabat vermək məsələsi müzakirə olunmalıdır”.

S. Seyidov Madriddə keçirilən toplantılarda Rusiya ilə Gürcüstan arasında yaranmış vəziyyətlə də bağlı müzakirələr aparıldığını deyib: “Avropa Şurası bu iki ölkə arasında problemin həll olunmasını istəyir. Bu məsələ AŞ PA-nın yanvar sessiyasının gündəliyinə də daxil edilib”.

S. Seyidov onu da deyib kİ. AŞ PA-nın qış sessiyası yanvarın 26-30-da keçiriləcək.

AŞPA