Xarici siyasət

Ana səhifə

Xarici siyasət

Benita Ferrero-Valdner Azərbaycanın da daxil olduğu “Şərq Tərəfdaşlığı” təşəbbüsü barədə kommunikeni təqdim edib

03 dekabr 2008 14:01 (UTC +04:00)

APA-nın Brüsseldəki müxbirinin verdiyi məlumata görə, kommunikeyə əsasən, Avropa Komissiyası altı Şərqi Avropa ölkəsi – Azərbaycan, Ermənistan, Belarus, Gürcüstan, Moldova və Ukrayna ilə yaxın illər ərzində assosiativ saziş imzalanmasını və bu ölkələrin Avropa İttifaqına inteqrasiyası meyllərini dəstəkləməyi təklif edib.

Kommunikedə qeyd olunur ki, bu sazişlər 2004-cü ildə genişləndirmə siyasətindən əvvəl Polşa və Litva ilə imzalanmış sazişin təkrarı olacaq. Yalnız “Şərq Tərəfdaşlığı” təşəbbüsünə daxil olan ölkələrə onların gələcəkdə Avropa İttifaqına qəbuluna dair vədlər öz əksini tapmayacaq. “Şərq tərəfdaşlığı” həmçinin ümumi daxili bazarın formalaşdırılması məqsədilə tədbirlər planını nəzərdə tutur. Belə tədbirlərə Avropa İttifaqının İslandiya, Norveç və Lixtenşteynlə birgə yaratdığı azad ticarət zonalarının yaradılması daxildir. Bu təşəbbüs həmçinin adı çəkilən ölkələrlə uzunmüddətli perspektivdə vizasız rejimin tətbiqini nəzərdə tutur.

Bundan başqa kommunikedə qeyd olunur ki, Ermənistan Metsamor AES-in fəaliyyətini dayandırmalıdır. Avropa Komissiyası münaqişə zonalarından keçən enerji infrastrukturunun, o cümlədən Dnestryanı ərazisindən keçən Rusiya-Balkan qaz kəmərinin taleyindən narahatlığını vurğulayıb. Sənədə əsasən, gələn ilin iyununda Avropa İttifaqının yeni siyasətinin təsis olunması məqsədilə “Şərq Tərəfdaşlığı” sammitinin keçirilməsi nəzərdə tutulur. Formata əsasən, hər ilin yazında Avropa İttifaqı və “Şərq Tərəfdaşlığı” ölkələrinin xarici işlər nazirlərinin, ildə iki dəfə isə nazirlərin görüşünü hazırlayacaq işçi qrupun iclasları keçiriləcək.

Kommunikedə Avropa İttifaqının “Şərq Tərəfdaşlığı” təşəbbüsünə qoşulacaq ölkələrə ayırdığı yardımı artırmağı nəzərdə tutur. Ümumilikdə 2010-2013-cü illərdə bu məqsədlə 350 milyon avro vəsait ayrılması nəzərdə tutulur.

Təqdim olunan sənən Avropa İttifaqı Şurasının 11-12 dekabrda keçiriləcək iclasında müzakirə olunacaq.