Xarici siyasət

Ana səhifə

Xarici siyasət

ABŞ hökuməti işğal altında olan ərazilərdəki abidələrin bərpası məsələsində Azərbaycana yardım göstərə bilər

03 dekabr 2008 16:02 (UTC +04:00)

Bakı. İlhamə İsabalayeva-APA. ABŞ hökuməti Azərbaycan Mədəniyyət və Turizm Nazirliyi ilə birgə abidələrin bərpası ilə bağlı bir neçə layihə həyata keçirməyi planlaşdırır. APA-nın məlumatına görə, bu barədə ABŞ-ın dövlət katibin köməkçisinin müavini Alina Romanovski bildirib.

Dağlıq Qarabağda Azərbaycan abidələrinin dağıdılmasına münasibət bildirən A. Romanovski onların bərpasına ABŞ hökuməti tərəfindən yardım göstərilməsinin mümkünlüyünü də qeyd edib: “Dağlıq Qarabağdakı abidələrin bir neçə əsrlik tarixi var. Çalışırıq ki, bu layihələrin tərkib hissəsi kimi həmin abidələrin də bərpasına kömək edək. Bu, özü-özlüyündə ABŞ-ın dünyanın mədəni və tarixi irsinə verdiyi qiymətin bariz nümunəsidir. Biz öz tərəfimizdən çalışırıq ki, ABŞ Konqresi tərəfindən bizə həvalə olunan tapşırığı yerinə yetirərək müxtəlif tarixi abidələrin qorunmasına və bərpasına səylərimizi artıraq”.

A. Romanovski bildirib ki, gələcəkdə müxtəlif müğənni və musiqiçilərin Azərbaycana dəvət etməyi də nəzərdə tuturlar. Bununla yanaşı, teatr və mədəniyyətin digər sahələrində də əməkdaşlıq planlaşdırılır. Bu əməkdaşlığın tərkib hissəsi olaraq, amerikalı mütəxəssislərin Azərbaycanda müxtəlif master-klaslar təşkil etməsi gözlənilir. ABŞ rəsmisi bu layihələrin həyata keçirilməsinə ümidli olduğunu da söyləyib.