Xarici siyasət

Ana səhifə

Xarici siyasət

Tiflisdə Azərbaycan-Gürcüstan hökumətlərarası komissiyasının iclası başa çatıb

04 dekabr 2008 12:09 (UTC +04:00)

Gürcüstan. Nizami Məmmədzadə - APA. Bu gün Tiflisdə Azərbaycan-Gürcüstan hökumətlərarası komissiyasının iclası keçirilib. APA-nın Gürcüstan bürosunun xəbərinə görə, toplantıdan əvvəl Azərbaycanın baş naziri Artur Rasizadə ilə Gürcüstanın baş naziri Qriqol Mqaloblişvili arasında görüş keçirilib.
Hökumətlərarası komissiyanın iclası başa çatandan sonra hər iki ölkənin baş naziri birgə mətbuat konfransı keçiriblər. Onlar qeyd ediblər ki, komissiyanın iclasında Azərbaycanla Gürcüstan arasında iqtisadi əlaqələrin inkişafı məsələləri müzakirə olunub.
Bakı-Tiflis-Qars dəmir yolunun çəkilişi layihəsi ilə bağlı jurnalistlərin suallarını cavablandıran Gürcüstanın baş naziri deyib ki, hazırda dəmir yolunun çəkilişi davam edir.
Q.Mqaloblişvili həm azərbaycanlı həmkarı ilə görüşdə, həm də hökumətlərarası komissiyanın iclasında bu məsələni müzakirə etdiklərini deyib. Baş nazir bu layihənin perspektivlərinin olduğunu söyləyib və qeyd edib ki, Gürcüstan, Türkiyə və Azərbaycanın müvafiq qurumları bu böyük layihənin həyata keçməsi üçün çalışır.
A.Rasizadə də qeyd edilən layihənin Azərbaycan hökumətinin diqqət mərkəzində olduğunu deyib. Dəmir yolunun çəkilməsi ilə bağlı arada kiçik ləngimə olduğunu qeyd edən A.Rasizadə bildirib ki, layihənin 2010-cu ildə tam başa çatacağına əmindirlər.
O, Bakı-Tiflis-Qars dəmir yolunun çəkilişi ilə bağlı üç ölkənin birgə monitorinq qrupu yaratdığını və qurumun növbəti toplantısının bu ayın ortalarında keçiriləcəyini deyib.
«Nabucco» kəmərinin Ermənistandan keçməsi mümkündürmü» sualına cavab olaraq A.Rasizadə deyib ki, Ermənistan Azərbaycan torpaqlarını işğal altında saxladığı üçün bu məsələdən söhbət gedə bilməz. Baş nazir bildirib ki, Azərbaycan tranzit ölkə kimi əldə etdiyi infrastruktur vasitəsi ilə «Nabucco» layihəsinin yüksək səviyyədə həyata keçirilməsi istiqamətində addımlar atacaq. Baş nazir Azərbaycanın «Nabucco» layihəsində öz qaz layihələrini müəyyənləşdirdiyini də diqqətə çatdırıb.
Daha sonra toplantı iştirakçıları Heydər Əliyevin Tiflisdəki büstünü ziyarət ediblər.
Qeyd edək ki, baş nazir A.Rasizadənin başçılıq etdiyi Azərbaycan nümayəndə heyətinə sənaye və energetika naziri Natiq Əliyev, təhsil naziri Misir Mərdanov, ekologiya və təbii sərvətlər naziri Hüseyn Bağırov, Dövlət Sərhəd Xidmətinin rəisi Elçin Quliyev, rabitə və informasiya texnologiyaları naziri Əli Abbasov, maliyyə naziri Samir Şərifov, kənd təsərrüfatı naziri İsmət Abasov, xarici işlər nazirinin müavini Vaqif Sadıqov, iqtisadi inkişaf nazirinin müavini Niyazi Səfərov, Dövlət Dəmir Yolu İdarəsinin rəisi Arif Əsgərov, Dövlət Gömrük Komitəsinin sədr müavini Rza Həsənəliyev, «SOCAR-Georgia»nın direktoru Mahir Məmmədov, Azərbaycan Dövlət Neft Şirkətinin şöbə müdiri Faiq Quliyev, Azərbaycan-Gürcüstan parlamentlərarası Dostluq Qrupunun rəhbəri Qənirə Paşayeva və başqaları daxildir.
Xatırladaq ki, iclasda əsasən energetika, nəqliyyat sahəsində əməkdaşlıq, sərhəd-gömrük proseduraları, qış aylarında Azərbaycandan Gürcüstana elektrik enerjisinin ötürülməsi, ölkələr arasında ticarət dövriyyəsinin artırılması imkanları və s. məsələlər müzakirə olunub.