Xarici siyasət

Ana səhifə

Xarici siyasət

Elmar Məmmədyarov: “Həmsədr ölkələr Madrid təkliflərinə bəzi düzəlişlər təqdim ediblər”

05 dekabr 2008 12:48 (UTC +04:00)

APA-nın Helsinkidə olan xüsusi müxbirinin verdiyi məlumata görə, bunu jurnalistlərə açıqlamasında Azərbaycanın xarici işlər naziri Elmar Məmmədyarov deyib. O, düzəlişləri təhlil etdiklərini və yəqin ki, həm xarici işlər nazirlərinin, həm də prezidentlərin növbəti görüşlərində bu məsələnin müzakirə olunacağını bildirib. E. Məmmədyarov prezidentlərin növbəti görüşünün gələn il baş tutacağını söyləyib. ATƏT Xarici İşlər Nazirləri Şurasının yekun Bəyannaməsində Azərbaycanın ərazi bütövlüyü məsələsinin əksini tapmayacağına dair sualı cavablandıran E. Məmmədyarov Azərbaycanın ərazi bütövlüyünün sual altında olmadığını bəyan edib: “Bu prinsip Moskva Bəyannaməsində də əksini tapıb. Orada münaqişənin beynəlxalq hüquq normaları və bu günə qədər qəbul olunmuş qətnamələr, qərarlar əsasında həll olunacağı qeyd edilib. Həmin qətnamə və qərarlarda isə birmənalı olaraq Azərbaycanın ərazi bütövlüyü tanınır. Hansısa ölkə və ya beynəlxalq qurumun Azərbaycanın ərazi bütövlüyünü şübhə altına aldığına inanmıram. Bunu etməyə çalışan yeganə ölkə Ermənistandır”.

E. Məmmədyarov Azərbaycanın Moskva Bəyannaməsini düzgün şərh etmədiyini söyləyən Ermənistanın xarici işlər naziri Edvard Nalbandyanın sözlərinə münasibətini soruşan jurnalistlərə cavabında bu barədə geniş danışmaq istəmədiyini vurğulayıb: “O, daxili siyasi məqsədlər baxımından nəsə deyə bilər. Mən bu barədə danışmaq istəmirəm. Siz istəsəniz, Bəyannaməni beynəlxalq hüquq üzrə mütəxəssislərə göstərə bilərsiniz. Onlar sənəddə nələrin qeyd olunduğunu şərh edə bilər”. Danışıqların intensivləşməsinin Azərbaycanı münaqişənin hərbi yolla həllindən uzaqlaşdırıb-uzaqlaşdırmadığına dair suala isə nazir belə cavab verib: “Mən xarici işlər naziri olaraq münaqişənin sülh yolu ilə həllini istəyirəm. Hələlik belə imkan var və Moskva Bəyannaməsinin imzalanmasından sonra mənim buna ümidim artıb. Kimsə daxili siyasət üçün bəyanat verə bilər. Amma sənəd ortadadır və orada Rusiya prezidentinin də imzası var”.

Amerikalı həmsədr Metyu Brayzanın Dağlıq Qarabağ ermənilərinin danışıqlarda de-fakto iştirak etdiyinə dair bəyanatına münasibətini açıqlayan E. Məmmədyarov bildirib ki, Ermənistan qoşunlarının işğal altındakı ərazilərdən çıxarılması, kommunikasiyaların açılması və məcburi köçkünlərin öz yerlərinə qayıtmasından sonra Dağlıq Qarabağın erməni və azərbaycanlı icmaları arasında hansısa mərhələdə müzakirələr ola bilər: “Onlar Dağlıq Qarabağın statusunu birlikdə müəyyən etməlidirlər – təbii ki, Azərbaycanın tərkibində”.

Dağlıq Qarabağın statusu ilə bağlı referendum keçirilməsinə gəldikdə isə, E. Məmmədyarov deyib ki, hansısa tədbiri keçirməzdən əvvəl onu hazırlamaq lazımdır: “Dağlıq Qarabağda azərbaycanlıların olmadığı bir şəraitdə bu məsələnin hüquqiliyindən danışmaq mümkün deyil. Ermənilər artıq Qarabağda referendumun keçirildiyini bildirirlər. Hansı referendumdan söhbət gedir? Müharibə şəraitində, avtomat lüləsi altında. Bu cür referendumları hər gün keçirmək olar. Biz isə bunun üçün müvafiq şəraitin yaradılmasını təklif edirik və Qafqazda baş verən son hadisələrin fonunda bu mövqeyimiz daha aktual görünür. İrəliləyiş əldə olunmalı, kommunikasiyalar açılmalı, insanlar öz evlərinə geri qayıtmalıdır”.

“Dağlıq Qarabağ münaqişəsinin həllindən əvvəl Türkiyə-Ermənistan sərhədinin açılmasının mümkün olub-olmadığı haqda sualı cavablandıran E. Məmmədyarov bunun hər iki ölkənin suveren hüququ olduğuna diqqət çəkib: “Amma Türkiyə dəfələrlə bu məsələyə öz münasibətini açıqlayıb. Əlbəttə ki, bu mövqe Türkiyə ilə Ermənistanın münasibətlərinə ciddi təsir göstərir”.

helsinki_elmar