Xarici siyasət

Ana səhifə

Xarici siyasət

Fuad İsmayılov: “Avstriyada Azərbaycanı iqtisadi və demoqrafik cəhətdən Cənubi Qafqazın lideri kimi qəbul edirlər”

14 avqust 2007 09:25 (UTC +04:00)

- Azərbaycanla Avstriya arasında siyasi, iqtisadi, mədəni və humanitar sahələrdə qarşılıqlı əlaqələr necə inkişaf edir?

- İki ölkə münasibətləri tədricən inkişaf etməkdədir. Qarşılıqlı əlaqələrin inkişafında dinamika olsa da, bununla bağlı çox böyük potensial var ki, hələ reallaşmayıb. İlk növbədə mən iqtisadi sahəni nəzərdə tuturam. Siyasi və mədəni səviyyədə çox yaxşı əməkdaşlığımız mövcuddur. Hazırda Mədəniyyət və Turizm Nazirliyinin xətti ilə layihələr həyata keçirilir. Ancaq iqtisadi sahədə reallaşmamış potensialdan istifadə etmək lazımdır.

- Avstriya iqtisadiyyat nazirinin Azərbaycana səfəri planlaşdırılır. Bu, iqtisadi əlaqələrin fəallaşmasına səbəb ola bilərmi?

- Avstriyanın iqtisadiyyat və əmək naziri Martin Bartenştayn Türkmənistan və Qazaxıstanda olduqdan sonra sentyabrın 19-da Bakıya gələcək. Bu səfər iki ölkə arasında iqtisadi əlaqələrin inkişafına təkan verəcək. Səfərdə əsas məqsəd enerji sahəsində əməkdaşlığın müzakirəsidir və bununla bağlı “Nabucco” layihəsinin həyata keçirilməsi ön plana çıxır. Bundan başqa, iqtisadiyyatın digər sahələrində əlaqələrin inkişafı da müzakirə ediləcək. Səfər zamanı daha sonra imzalanacaq müqavilələr də müəyyənləşdirilməlidir. Qonaq Yanacaq və Energetika, İqtisadi İnkişaf, Mədəniyyət və Turizm nazirliklərində, həmçinin Dövlət Neft Şirkətində görüşlər keçirəcək.

- Yeri gəlmişkən, Mədəniyyət və Turizm Nazirliyi son vaxtlar Avstriya ilə qarşılıqlı əlaqələrin möhkəmlənməsindən tez-tez danışır.

- Artıq Avstriyanın Krems Universiteti ilə bizdə bu yaxınlarda yaradılmış Turizm İnstitutu arasında müqavilə imzalanıb. Bu sənədə uyğun olaraq Avstriya universiteti turizm sahəsində kadr hazırlığı və menecerlərin təlim proqramlarının hazırlanmasında bizə kömək edəcək.

- Avstriya prezidentinin Azərbaycana səfəri yəqin ki, münasibətlərin xeyli möhkəmlənməsinə səbəb olacaq.

- Avstriya prezidentinin Azərbaycana səfəri hazırda gündəmdədir. Səfər bu ilə planlaşdırılırdı. Ancaq 2006-cı ilin birinci yarısında Avstriya Avropa Birliyinə sədrlik edirdi, payızda isə ölkədə parlament seçkiləri keçirildi, ona görə də səfər 2008-ci ilə qaldı. İqtisadiyyat və əmək nazirinin səfəri sırasında prezidentin səfər proqramı ilə bağlı məsələlər də müzakirə olunacaq. Prezidentin səfəri zamanı təhsil, humanitar elmlər və mədəniyyət sahələrində bəzi sənədlər imzalana bilər.

- Payızda Avstriya parlamentinin üzvlərinin də Azərbaycana gələcəyi gözlənilir. Siz parlamentlərarası əlaqələrin perspektivini necə qiymətləndirirsiniz?

- Perspektivlər bizdən asılıdır. Hələlik bu sahədə qarşılıqlı əlaqələr müxtəlif beynəlxalq strukturlarda deputatların təmasları səviyyəsindədir. Ancaq bizim məqsədimiz birbaşa əlaqələrin qurulmasıdır. Ümid edirəm ki, avstriyalı parlamentarların qarşıdakı səfəri buna kömək edəcək. Səfərin dəqiq nə vaxt baş tutacağını söyləmək çətindir, bu məsələ Avstriya parlamentində nəzərdən keçirilir. Onlar hazırda Cənubi Qafqazla parlamentlərarası əməkdaşlıq üçün deputat qrupu yaradırlar. Bu qrupun formalaşması başa çatan kimi, biz səfərin dəqiqi tarixini biləcəyik.

- Azərbaycan diplomatiyası Avstriyada Dağlıq Qarabağ münaqişəsi ilə bağlı hansı işlər görür?

- Vyana ilk növbədə ATƏT-lə assosiasiya olunur, çünki təşkilatın qərargahı bu şəhərdə yerləşir. Dağlıq Qarabağ münaqişəsinə dair əsas diskussiyalar da məhz ATƏT çərçivəsində aparılır. Avstriyanın özünə gəldikdə isə, mən deyə bilmərəm ki, bu məsələ gündəmdəki əsas mövzulardan biridir. Ancaq bununla yanaşı, Avstriya bir sıra beynəlxalq təşkilatların BMT-nin, ATƏT-in, Avropa Birliyinin, Avropa Şurasının fəal üzvü kimi bu qurumların işində iştirak edir və onun mövqeyi dünya ictimaiyyətinin mövqeyi ilə üst-üstə düşür. Avstriya Dağlıq Qarabağ münaqişəsinin beynəlxalq hüquq normalarına uyğun həllinə tərəfdardır.

- Bəs bu ölkədəki diasporamız nə qədər fəaldır?

- İstərdik ki, onlar daha fəal olsunlar. Avstriyada bir neçə diaspora təşkilatımız var və bəziləri 90-cı illərin əvvəlində yaradılıb. Bu qurumların əsas məqsədi Azərbaycanın və ölkəmizin mədəniyyətinin təbliğidir. Avstriyada təhsil alan tələbələrimizin təşkilatı daha fəaldır. Təbii ki, səfirlik onlara kömək edir.

- Məşhur tarixçi Erix Fayql türk xalqlarının, o cümlədən Azərbaycanın böyük dostu olub. Avstriyada onun ardıcılları varmı?

- Erix Fayql unikal, əsl mənada səmimi, Azərbaycanı sevən bir insan idi. Bu cür adamlar dünyaya tez-tez gəlmir. Onun konkret davamçıları haqda danışmaq çətindir, amma mərhum çox hörmətli şəxsiyyət idi. Onun dostları arasında bir çox insan var ki, Azərbaycanla Avstriya arasındakı münasibətlərin inkişafı naminə çalışmağa hazırdır.

- Ötən il Avstriyada Üzeyir Hacıbəyovun abidəsinin açılışı oldu. Bu tipli tədbirlər yenə planlaşdırılırmı?

-Yaxın vaxtlarda Sloveniyada Mehdi Hüseynzadənin abidəsinin açılışı planlaşdırılır. Bu, oktyabrda Novoqoritsa şəhərində olacaq. Orada vaxtilə partizan dəstələri fəaliyyət göstərib. İndi biz bu məsələ üzərində işləyirik. 2008-ci ildə Avstriyanın bəzi şəhərlərində “Arşın mal alan” operasının təkrar səhnəyə qoyulması gözlənilir. Avstriya tərəfi də Azərbaycanda bəzi mədəni tədbirlər planlaşdırır.

- Sizin səfirliyiniz bir sıra beynəlxalq təşkilatlarda akkreditə olunub. Bu istiqamətdə işiniz necə gedir? ATƏT-in fəaliyyətdə olan sədri Migel Anhel Moratinosla görüşürsünüzmü?

- Migel Anhel Moratinos Vyanaya nadir hallarda gəlir. O, yanvar ayında burada idi və ATƏT Daimi Şurasının iclasında iştirak edirdi. M. A. Moratinos ATƏT-in fəaliyyətdə olan sədri kimi təkcə Ermənistan-Azərbaycan münaqişəsinin yox, ATƏT məkanındakı digər münaqişələrin də həllinə böyük maraq göstərir.

- Azərbaycanda Avstriya səfirliyinin açılması planlaşdırılırmı?
- Hazırkı məqamda Avstriyanın belə bir planı yoxdur. Bunun səbəbi kimi onlar maliyyə çatışmazlığını göstərirlər. Buna baxmayaraq, müxtəlif söhbətlərdə dəfələrlə vurğulanıb ki, Cənubi Qafqaz regionunda onları ən çox Azərbaycan maraqlandırır. Azərbaycanı iqtisadi və demoqrafik aspektdə lider kimi qəbul edirlər. /APA/