Xarici siyasət

Ana səhifə

Xarici siyasət

Per Stankina: “Almaniya Azərbaycanın sərhədlərinə və ərazi bütövlüyünə hörmət edir”

17 avqust 2007 10:40 (UTC +04:00)

- Azərbaycanla Almaniya arasındakı qarşılıqlı əlaqələr hansı səviyyədədir?

- İki ölkənin qarşılıqlı əlaqələri çox yaxşı səviyyədədir və hər gün inkişaf edir. Ancaq hər şey daha yaxşı ola bilər və biz bunun üzərində çalışırıq. Almaniya səfirliyi Azərbaycanda müxtəlif sahələr üzrə çox fəal işləyir. Mən bu günlərdə Lənkəranda oldum, gələn həftə isə Gəncə və Xanlara gedəcəyəm. Bu yaxınlarda sənaye və energetika naziri Natiq Əliyevlə görüşdüm və biz bir sıra layihələrlə bağlı əməkdaşlığı, eləcə də Almaniya işgüzar dairələrinin oktyabr ayında Bakıya gözlənilən səfərini müzakirə etdik.

- İqtisadi sahədə Azərbaycan-Almaniyanın münasibətlərinin vəziyyətini necə qiymətləndirirsiniz?

- Münasibətlər çox fəaldır. Ötən il ölkələrimiz arasında ticarət dövriyyəsinin həcmi 1 milyard avronu aşıb. Bu, çox pozitiv göstəricidir. Azərbaycan prezidenti İlham Əliyevin bu ilin əvvəlində Almaniyaya səfəri siyasi-iqtisadi əlaqələrin inkişafına yaxşı impuls verdi. Bu səfərdən sonra Almaniyadan üç iqtisadi nümayəndə heyəti bura gəldi, oktyabrda isə federal iqtisadiyyat nazirinin səfəri olacaq. Biz hər iki tərəf üçün çox faydalı olan biznes forumlar keçirmişik.

- Mədəni sahədə də əlaqələr fəal inkişaf etməkdədir.

- Elədir. Məsələn, gələn il Almaniyada Azərbaycan Mədəniyyət Günləri keçiriləcək. Almaniya tərəfi də tezliklə Azərbaycanda bir sıra mədəni tədbirlər keçirməyi planlaşdırır. Bir neçə həftə sonra biz Bakıda və Azərbaycanın regionlarında geniş sərgilər təşkil edəcəyik.

- Almaniya Avropa Birliyinin üzvüdür. Azərbaycanın nə vaxtsa bu təşkilata üzv olması mümkündürmü?

- Əlbəttə ki, mümkündür. On il əvvəl kim inanardı ki, Rumıniya və Bolqarıstan Avropa Birliyinin üzvü olacaq. 20 il əvvəl isə heç kim inanmazdı ki, Sovet İttifaqı nə vaxtsa dağılacaq. Ərazisi genişlənərsə, Avropa Birliyi bundan yalnız uda bilər. Ancaq hər bir ölkə öz gələcəyini özü müəyyənləşdirməlidir. Sizin ölkəniz bəyan edib ki, Qərb orientasiyalı siyasət yeritmək istəyir və Avropa dəyərlərinə hörmət edir. Azərbaycan hökuməti Avropa standartlarına yaxınlaşmaq istədiyini bildirib. Ona görə də Azərbaycanın nə vaxtsa AB-yə qoşulması mümkündür.

- Azərbaycan AB-yə qoşulmaq üçün konkret nə etməlidir?

- Hazırda Azərbaycan Avropa Birliyinə üzvlük üçün tələb olunan mövqedən uzaqdadır. Azərbaycan bu təşkilatın üzvü olmaq üçün çox addım atmalıdır - əlbəttə ki, demokratikləşmə sahəsində - amma bu, yeganə aspekt deyil. Azərbaycan 35 başlıq üzrə işləməyə başlamalıdır. Bu başlıqlar Avropa millətinin həyatının bütün sahələrini əhatə edir. Rumıniya və Bolqarıstan bu yolu keçib və proses 10-15 il davam edib. Mümkündür ki, digər ölkələrdə daha çox davam etsin.

- Bəzi ekspertlər ATƏT-in Minsk Qrupunun yarıtmaz fəaliyyətindən gileylənir və həmsədrlərin dəyişməsindən sonra vəziyyətin dəyişə biləcəyini deyirlər. Almaniya həmsədr olmaq təşəbbüsü ilə çıxış etmək istəyərmi?

- Təbii ki, yox. Minsk Qrupu çox fəal işləyir. Ancaq bu qrup siyasət yeridə bilməz, bununla Azərbaycan və Ermənistan prezidentləri məşğul olmalıdır. Minsk Qrupu prosesi yumşaltmaq üçün hər iki tərəflə danışmalı, təkliflər irəli sürməlidir. Qərarı isə hökumətlər verməlidir. Hər iki ölkə hökumətləri hələlik qərar qəbul etməyə hazır deyil. Almaniyanın Dağlıq Qarabağ məsələsində mövqeyinə gəldikdə isə, bu mövqe bir olub və olacaq biz Azərbaycanın sərhədləri və ərazi bütövlüyünə hörmət edirik.

- Tezliklə Bundestaq üzvləri Azərbaycana gələcək. Siz iki ölkənin parlamentlərarası münasibətlərini necə qiymətləndirirsiniz?

- Milli Məclislə Bundestaqın çox yaxın əlaqələri var. Tərəflər istər birbaşa, istərsə də beynəlxalq təşkilatlardakı nümayəndə heyətləri vasitəsilə birgə işləyir. Azərbaycana Almaniya parlamentindən iki nümayəndə heyəti gələcək. Birinci heyətin səfəri bu həftənin bazar günü, digərinin səfəri isə oktyabr ayında baş tutacaq. /APA/