Xarici siyasət

Ana səhifə

Xarici siyasət

Elmar Məmmədyarov : “Qoşulmama Hərəkatına sədrliyi dövründə Azərbaycanın prioritetləri Bandunq prinsiplərinə əsaslanacaq”

26 oktyabr 2019 20:19 (UTC +04:00)

Bu gün Qoşulmama Hərəkatına üzv ölkələrin dövlət və hökumət başçılarının XVIII Zirvə Görüşü başa çatıb.

APA-nın məlumatına görə, Azərbaycan Xarici İşlər naziri Elmar Məmmədyarov bildirib ki, Azərbaycan üçün belə bir tədbirə ev sahibliyi etmək şərəf idi.
.
E. Məmmədyarov deyib ki, Azərbaycan 2019-cu ildən 2022-ci ilə qədər Qoşulmama Hərəkatına sədrliyi öz üzərinə götürür: “Azərbaycana etimad göstərdiyiniz üçün hamınıza təşəkkür edirəm. Ümid edirik ki, biz çoxtərəfli əməkdaşlığı inkişaf etdirəcəyik. Azərbaycan artıq donor ölkəyə çevrilib. Azərbaycan Qoşulmama Hərəkatının üzvü olan müxtəlif ölkələrə yardımlar ayırır və bu yardımlar davam edəcək. Qəbul edilən sənədlər göstərir ki, Qoşulmama Hərəkatı yenə də qlobal problemlərin həllinə öz töhfəsini verəcək. Qoşulmama Hərəkatına sədrliyi dövründə Azərbaycanın prioritetləri Bandunq prinsiplərinə əsaslanacaq. Əsas məqsədimiz Qoşulmama Hərəkatına inamı və bu qurumun rolunu artırmaq olacaq”.

Xarici işlər naziri qeyd edib ki, 25 ildən çoxdur ki, Azərbaycan torpaqlarının Ermənistan tərəfindən işğal edilməsindən əziyyət çəkir: “Azərbaycan son 25 ildə böyük iqtisadi və sosial nailiyyətlər əldə edib. Azərbaycanın təşəbbüskarı olduğu enerji layihələri dünyada sülhə və təhlükəsizliyə töhfə verir. Biz sədrliyimiz dövründə iqtisadi inkişafa da önəm verəcəyik. Azərbaycan sədrliyi dövründə digər beynəlxalq təşkilatlarla da dialoqun inkişafına önəm verəcək. Mədəniyyətlərarası və sivilizasiyalararası dialoqu təşviq edəcəyik. Biz hər kəsə bu Zirvə Görüşündə iştirakınıza görə təşəkkürümüzü bildiririk”.