Xarici siyasət

Ana səhifə

Xarici siyasət

Avropa Birliyi Ukrayna vətəndaşları üçün vizan tələbini ləğv edib

17 may 2017 15:29 (UTC +04:00)

Avropa Birliyi Ukrayna vətəndaşları üçün vizan tələbini ləğv edib. APA-nın “RİA-Novosti”-yə istinadən verdiyi məlumata görə, Avropa Parlamentinin sədri Antonio Tayani və quruma sədrlik edən Maltanın daxili işlər naziri Karmelo Abela Ukrayna vətəndaşlarına üçün vizasız rejimin tətbiqinə dair Avropa İttifaqı qanunvericiliyinə dəyişikliklərin edilməsi barədə sənəd imzalayıb. A. Tayani və K. Abela 15 mart 2001-ci ilin viza siyahısına dair reqlamentə dəyişiklik edəcək Avropa parlamenti və Avropa Şurası reqlamentlərinə öz imzalarını qoyub. Beləliklə, ukraynalılar Şenqen zonasının xarici hüdudlarını keçərkən viza tələb olunmayan ölkə vətəndaşları siyahısına salınıb. Mərasimdə Ukrayna prezidenti Petro Poroşenko iştirak edib. İmzalanma mərasimindən sonra reqlament Avropa Birliyinin rəsmi jurnalında dərc olunacaq. Ukrayna vətəndaşları üçün vizasız rejimin iyunun 11-də qüvvəyə minəcəyi gözlənilir. Bundan sonra Ukrayna vətəndaşları 180 günlük müddətdə 90 günədək Aİ ölkələrinə vizasız səfər edə biləcək. Bununla belə, miqrasiya və təhlükəsizlik ilə əlaqədar ciddi narahatlıq yaranarsa vizasız rejim ləğv oluna bilər. Bu cür mexanizmin tətbiq edilməsi Ukrayna və Gürcüstan vətəndaşları üçün vizaların ləğv edilməsini mümkün edən şərtlərdən biridir.