"Qadın Liderliyi Uğrunda” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Uğur qazanmış qadınlarla bağlı podkastların hazırlanması” layihəsini həyata keçirib.
APA xəbər verir ki, layihə çərçivəsində çəkilmiş podkastların iştirakçıları müxtəlif sahələrdə öz fərdi bacarıqları sayəsində karyera qurmuş, ictimai nüfuz qazanmış xanımlardır.
Podkastlarda Azərbaycanın Xalq artisti Həmidə Ömərova, beynəlxalq dərəcəli qrossmeyster Zeynəb Məmmədyarova, “APA Media Group”un rəhbəri Vüsalə Mahirqızı, “İnklüziv rəqs” şirkətinin direktoru Nigar Sultanova, “Sağlam Ailə” tibb mərkəzinin icraçı direktoru Nigar Rüstəmli, Kann film festivalının ilk azərbaycanlı iştirakçısı, aktrisa Zülfiyyə Qurbanova, polis polkovnik-leytenantı Kəmalə Ələkbərova, "Yeni Klinika" tibb müəssisəsinin İctimaiyyətlə əlaqələr şöbəsinin müdiri Nuridə Allahyarova, bəstəkar Gövhər Həsənzadə və siyasi analitik Yeganə Hacıyeva iştirak ediblər. Onlar öz uğur hekayələrini danışıblar və müxtəlif hadisələrlə bağlı fikirlərini bölüşüblər.
Qeyd edək ki, podkastlar müvafiq olaraq Youtube, Telegram, Facebook sosial platformalarında yayımlanacaq.
"Uğur qazanmış qadınlarla bağlı podkastların hazırlanması” layihəsi müxtəlif sahələrdə öz fərdi bacarıqları sayəsində karyera qurmağa nail olmuş şəxslərin, vəzifə sahiblərinin uğur hekayələrinin təqdimatı yolu ilə qadınların təhsil pillələrində irəliləməsinə, karyera quruculuğuna və liderliyə həvəsləndirilməsinə, təşviq edilməsinə istiqamətlənib.
Layihənin əsas ideyası hazırlanacaq podkastlar vasitəsilə cəmiyyətdə qadınlarla bağlı formalaşmış xoşagəlməz təsəvvürlərin aradan qaldırılmasına, qızların təhsilə və karyera quruculuğuna həvəsləndirilməsinə dəstək olmaqdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
