Bakı. Ramil Məmmədli - APA. Azərbaycan Demokrat Partiyası (ADP) sədrinin gənclərlə iş üzrə müavini Cəmil Hacıyev Ədliyyə Nazirliyinin Məhkəmə Qərarlarının İcrası İdarəsinin Binəqədi şöbəsinə dəvət edilib.
Partiyanın mətbuat xidmətindən APA-ya verilən məlumata görə, adıçəkilən şöbənin əməkdaşları C. Hacıyevin yaşadığı evə gələrək, yanvarın 12-də keçirilən aksiyada iştiraka görə, edilən cərimənin ödənilməsini tələb ediblər. Ona əks təqdirdə əmlakından bəzi əşyaların müsadirə olunacağına dair xəbərdarlıq da olunub. Bununla yanaşı, C. Hacıyev şöbəyə də dəvət edilib. Burada isə şöbə rəisinin müavini Emil Əhmədli ondan cərimənin ödənilməsini istəyib, o cümlədən bu kimi aksiya və kampaniyalara qoşulmamaq barədə ona xəbərdarlıq edib. Şöbədə təkrar olaraq, C. Hacıyevə bildirilib ki, onun adına olan əmlakla bağlı müvafiq idarələrə sorğu göndərilib və cəriməni ödəmədiyi təqdirdə əmlakı müsadirə ediləcək.
Qeyd edək ki, C. Hacıyev yanvarın 12-də paytaxtda keçirilən “Əsgər ölümlərinə son” aksiyasında iştirak zamanı saxlanılıb. Məhkəmə onun hərəkətlərini ictimai asayişin pozulması kimi dəyərləndirərək, 500 manat məbləğində cərimə kəsib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
