Bakı - APA. Qırğızıstanda (İssık-Kul) Türk Dünyası Riyaziyyat Cəmiyyətinin V konqresi keçirilib.
AMEA-nın Riyaziyyat və Mexanika İnstitutundan APA-ya verilən məlumata görə, Konqresdə dünyanın 20 ölkəsindən 300-ə yaxın riyaziyyatçı alim iştirak edib.
Tədbirdə Azərbaycandan Türk Dünyası Riyaziyyat Cəmiyyətinin prezidenti, AMEA-nın Riyaziyyat və Mexanika İnstitutunun direktoru, professor Misir Mərdanov, BDU-nun Tətbiqi Riyaziyyat İnstitutunun direktoru, cəmiyyətin vitse-prezidenti Fikrət Əliyev, həmin institutun professoru, cəmiyyətin İdarə Heyətinin üzvü Yusif Qasımov, MDU-nun Bakı filialının professoru, İdarə Heyətinin üzvü Azad Tağızadə və başqaları iştirak edib.
Qeyd edək ki, 2011-ci ildə cəmiyyətin Bakıda keçirilən IV konqresində fizika-riyaziyyat elmləri doktoru, professor Misir Mərdanov cəmiyyətin prezidenti seçilib. O, Qırğızıstanda keçirilən konfransda cəmiyyətin 3 illik fəaliyyəti haqqında tədbir iştirakçılarına ətraflı məlumat verib.
Türk Dünyası Riyaziyyat Cəmiyyəti V konqresinin bağlanış iclasında qarşıdan gələn 3 il müddətinə Qırğızıstan Elmlər Akademiyasının akademiki Altay Borubayev cəmiyyətin prezidenti, Misir Mərdanov cəmiyyətin fəxri prezidenti, akademik Fikrət Əliyev cəmiyyətin vitse-prezidenti, professor Azad Tağızadə və Yusif Qasımov idarə heyətinin üzvü seçiliblər.
Konqresdə Türk Dünyası Riyaziyyat Cəmiyyətinin növbəti konqresinin 2017-ci ilin yayında Qazaxıstanın Astana şəhərində keçirilməsi qərara alınıb. Fərqli dillərdə riyaziyyat terminləri sözlüyünün hazırlanması üçün prof. Hasan Hilmi Hacısalihoğlunun rəhbərliyi ilə 4 nəfərdən ibarət Komissiya yaradılıb. Azərbaycandan AMEA-nın Riyaziyyat və Mexanika İnstitutunun professoru Məmməd Bayramoğlu həmin komissiyanın üzvü seçilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
