Sənaye və energetika

Ana səhifə

Masallının iki kəndinə qaz verilib

27 oktyabr 2012 06:58 (UTC +04:00)

Masallı. Ağəddin Babayev – APA. Ötən gün Masallının daha iki yaşayış məntəqəsinə təbii qazın verilişi bərpa olunub. APA-nın cənub bürosunun məlumatına görə, rayonun Həsənli və Məmmədxanlı kəndlərinə təbii qaz verilib və bu münasibətlə təntənəli mərasim keçirilib.

ARDNŞ-in “Azəriqaz” İstehsalat Birliyinin və Masallı Rayon İcra Hakimiyyəti Aparatı nümayəndələrinin, kənd sakinlərinin qatıldığı tədbirdə bildirilib ki, rayon mərkəzindən 13 km-lik məsafədə yerləşən Həsənli kəndində 535, Məmmədxanlı kəndində isə 180 evdə sayğac quraşdırılıb.

Masallı Rayon Qaz İstismar Sahəsindən APA-nın yerli bürosuna verilən məlumata görə, hazırda rayonun 70 faizi təbii qazla təchiz olunub. Cari ilin sonunadək daha iki yaşayış məntəqəsinə qazın verilməsi nəzərdə tutulub.

Hazırda rayon üzrə təbii qazdan istifadə edən abonentlərin sayı 23 min 155-i ötüb. “Regionların sosial-iqtisadi inkişafına dair Dövlət Proqramı”na (2009-2013-cü illər) müvafiq olaraq Masallı rayonunda qazlaşdırma işləri gələn il tam başa çatdırılmalıdır.