Amerika

Ana səhifə

Amerika

ABŞ Dövlət Departamenti iranlı professorun ölümü ilə bağlı Vaşinqtona ünvanlanan ittihamları rədd edib

12 yanvar 2010 15:48 (UTC +04:00)

Moskva-APA. ABŞ Dövlət Departamenti İranın nüvə mütəxəssisi Məsud Əli Məhəmmədinin ölümündə Amerika xüsusi xidmət orqanlarının ittiham edilməsini absurd adlandırıb. APA-nın məlumatına görə, ABŞ Dövlət Departamentinin nümayəndəsi Mark Toner bildirib ki, partlayışın Mərkəzi Kəşfiyyat İdarəsi tərəfindən törədilməsi barədə ittihamlar əsassızdır.
Qeyd edək ki, Tehranın Qeytəriyyə məhəlləsində baş vermiş terror aktı ilə bağlı Tehran prokurorluğu və İran Xarici İşlər Nazirliyi açıqlama yayıb. APA-nın məlumatına görə, Tehran şəhər prokuroru Abbas Cəfəri Dövlətabadi Tehran Universitetinin fizika kafedrasının professoru Məsud Əli Məhəmmədinin terror aktı nəticəsində öldürülməsində İsrailin xüsusi xidmət orqanı “Mossad”ın və ABŞ Mərkəzi Kəşfiyyat İdarəsinin əli olduğunu bildirib.

İran Xarici İşlər Nazirliyinin sözçüsü Ramin Mehmanpərəst də Tehranda baş vermiş terror aktının İranın düşmənləri tərəfindən törədildiyini bəyan edib. Mehmanpərəst aparılan araşdırmalar nəticəsində əldə olunan ilkin qənaətə görə bu terror aktının İsrail və ABŞ-ın xüsusi xidmət orqanları tərəfindən həyata keçirildiyi bildirib: “Belə hadisələr İran xalqını sarsıltmayacaq və nüvə sahəsində də heç bir işin ləngiməsinə səbəb olmayacaq. Cinayətkarlar gec tez həbs öz cəzalarını alacaqlar”.

Qeyd edək ki, Tehranın Qeytəriyyə məhəlləsində baş verən partlayış nəticəsində Tehran Universitetinin fizika kafedrasının professoru Məsud Məhəmmədi həlak olub. O bu gün səhər evinin qarşısında quraşdırılan bombanın işə düşməsi nəticəsində dünyasını dəyişib. Bombanın uzaqdan idarəetmə üsulu ilə işə salındığı bildirilir. Məsud Məhəmmədi İranın tanınmış nüvə mütəxəssislərindən biri sayılır.