Amerika

Ana səhifə

Amerika

Haitidə ölənlərin sayı 50 min nəfərə çatıb - FOTOSESSİYA

Haitidə ölənlərin sayı 50 min nəfərə çatıb - <font color=red>FOTOSESSİYA</font>

15 yanvar 2010 08:39 (UTC +04:00)

Haiti-APA. Haiti Qırmızı Xaç Komitəsi ada-dövlətdə baş verən dağıdıcı zəlzələ nəticəsində ən azı 50 min nəfərin öldüyünü açıqlayıb. APA-nın məlumatına görə, bu, ilkin rəqəmlərdir. Haiti hökumətinin üzvləri təbii fəlakət nəticəsində ölənlərin sayının 500 min nəfərə çatacağını ehtimal edirlər. Ümumilikdə zəlzələdən 3 milyon insanın zərər çəkdiyi bildirilir.
Dünən ölkədə ilk kütləvi dəfn mərasimi keçirilib. Haiti prezidenti Rene Preval qardaşlıq məzarında 7 min insanın dəfn olunduğunu bildirib. BMT-nin Haitidəki missiyası isə ölən əməkdaşlarının sayına dair yeni rəqəmlər açıqlayıb. Zəlzələ nəticəsində BMT-nin Haiti missiyasında çalışan 36 nəfər ölüb, 73 nəfər yaralanıb, 160 əməkdaş isə itkin düşüb. YUNESKO-nun Haitidəki bölməsinin 14 əməkdaşından 8-nin taleyindən xəbər yoxdur. Haitidə ölənlər arasında ABŞ Dövlət Departamentinin 57 yaşlı əməkdaşı Viktoriya Delonq da var. ABŞ səfirliyinin üç əməkdaşının taleyi isə naməlumdur.
Haitidə humanitar yardımların çatdırılması davam edir. Zəlzələ zamanı Port-o-Prens aeroportunun uçuş xətti ciddi zədələndiyindən təyyarələrin enib-qalxmasında ciddi problemlər yaranır. Bundan başqa məhdud yanacaq ehtiyatı olduğuna görə aeroporta enən bir çox təyyarələr geri qayıda bilmirlər. Bu gündən etibarən Haitiyə humanitar yardım aparan təyyarələr qonşu Dominikan Respublikasında yerə enir, oradan yüklər quru yolu ilə Haitiyə çatdırılır.
Fransa prezidenti Nikola Sarkozi Haitinin bərpasına dair beynəlxalq konfrans çağırılmasını təklif edib. O hazırda bu təklifi dünya ölkələrinin rəhbərləri ilə müzakirə etdiyini bildirib. ABŞ dövlət katibinin müavini Filipp Krouli hələlik zəlzələ bölgəsində soyğunçuluq hallarına çox az-az rast gəlindiyini deyib. O ictimai asayişin qorunması üçün bölgəyə hava-desant diviziyası əsgərlərinin göndəriləcəyini qeyd edib. Hərbçilər xilasetmə əməliyyatlarında iştirak etməklə yanaşı, yardımların əhaliyə çatdırılmasına da yardım göstərəcəklər. Ümumilikdə bölgəyə 3 minədək hərbi qüvvənin göndərilməsi nəzərdə tutulur.
Hazırda Haitidə sanitar vəziyyət dözülməz həddə çatıb. Meyitlərin küçələrdən yığışdırılmaması əhali arasında ciddi narazılığa səbəb olub. İnsanlar öz etirazlarını ifadə etmək üçün küçələrdə meyitlərdən barrikadalar qururlar. Meksikanın Haitidəki səfiri Everardo Suares jurnalistlərə verdiyi açıqlamada bildirib ki, hakimiyyət orqanları meyitlərin dəfni prosesini təşkil edə bilmirlər: “Küçələrdə yüzlərlə meyit var. Su, elektrik enerjisi və tibbi yardım çatışmazlığı ciddi problemlər yaradır. Gecələr küçələrə çıxmaq mümkün deyil, kriminal dəstələr kütləvi soyğunçuluqla məşğul olur”.