Amerika

Ana səhifə

Amerika

ABŞ Konqresinin Helsinki Komissiyasının həmsədri Ermənistanda müşahidə olunan anti-semitizmdən heyrətə gəldiyini bəyan edib

21 aprel 2008 16:28 (UTC +04:00)

APA-nın ABŞ bürosunun məlumatına görə, dinləmələrdə “Ermənistan seçkilərdən sonra” mövzusunda çıxış edən Benjamin L. Cardin fevralın 14-də hakimiyyətin nəzarətində olan H2 televiziya kanalında nümayiş olunan “sənədli film”də həyat yoldaşı yəhudi olan keçmiş prezident Levon Ter-Petrosyanın sionist agenti olmaqda günahlandırıldığını, etiraz edən insanların isə kobud cəhdlə guya ki, Ermənistana qarşı hansısa Yəhudi-İsrail çevrilişində iştirak etməkdə diskreditasiya olunduqlarını diqqətə çatdırıb: “Mən heç vaxt düşünməzdim ki, Ermənistanda bu cür anti-semitizm görərəm”.
Ermənistan prezidentliyinə namizəd və müxalifət hərəkatının rəhbəri L. Ter-Petrosyanın müşaviri Arman Qriqoryan isə çıxışında seçicilərə, müxalifət nümayəndələrinə geniş miqyasda hədə-qorxu gəlinməsi, səslərin sayılması prosedurlarının pozulması, səslərin saxtalaşdırılması kimi halların qeydə alındığını qeyd edib. Onun sözlərinə görə, seçki o qədər biabırcasına saxtalaşdırılıb ki, 17 dairədə (15%-dən çox) seçkilər “pis” və yaxud “çox pis” kimi qiymətləndirilib: “Hətta bütövlükdə ölkədəki seçki dairələrinin yalnız 10%-də səslər oxşar keyfiyyətlə sayılsaydı belə, Mərkəzi Seçki Komissiyasının Serj Sarkisyanı birinci mərhələnin qalibi elan etməsi mümkün deyildi”. A. Qriqoryan deyib ki, seçkinin nəticələri o qədər saxtalaşdırılıb ki, rəsmi məlumatlara görə, ölkədə olan 95 dairədə seçicilərin iştirak faizi 90%-i keçib, bu dairələrdən 44-də isə seçicilərin iştirakı 95%-dən də artıqdır: “Rejimin adamları öz boslarını razı salmaq üçün o qədər səy göstəriblər ki, hətta bir dairədə səsvermə hüququ olan şəxslərin iştirakı 100,36% təşkil edib. Bu onu göstərir ki, rejim Ermənistandakı səsvermə hüququ olan şəxslərin sayını dramatik şəkildə şişirdib. Hökumətin rəsmi məlumatına görə, bütövlükdə 3228300 şəxsin Ermənistan vətəndaşlığı var. Halbuki, Mərkəzi Kəşfiyyat İdarəsinin 2006-cı il üçün hazırladığı Dünya Fakt Kitabında Ermənistan vətəndaşı olan şəxslərin sayı 2976372 nəfər göstərilir. Onların da təxminən 750 000-i Rusiya və Avropada yaşayır. Bu isə o deməkdir ki, 2008-ci il fevralın 19-a olan dövrdə Ermənistanda bütün yaşlar üzrə 2226372-2478300 arası vətəndaş yaşayıb. Rəsmi rəqəmlərə görə, 2008-ci il fevralın 19-a kimi Ermənistanda yaşı 15-dən aşağı olan ümumilikdə 600300 vətəndaş olub. Hazırda respublikada yaşı 18-dən aşağı olanların sayı isə təxminən 745300-dir. Bu faktlar göstərir ki, 2008-ci il fevralın 19-a olan dövrdə respublikada 1481072-1733000 arası səsvermə hüququ olan şəxs olub. Ermənistan Mərkəzi Seçki Komissiyasının məlumatına görə, 1671027 vətəndaş səs verib. Mərkəzi Kəşfiyyat İdarəsinin Dünya Fakt Kitabındakı rəqəmləri əsas götürsək, onda respublikada səsvermə hüququ olanlardan 189955 nəfər artıq səs verilib. Əgər kimsə Ermənistan hökumətinin təsdiqlədiyi əhalinin statistikası ilə bağlı rəqəmlərlə seçkinin səsverməsini ölçsə, o zaman məlum olur ki, səsvermə hüququ olan əhalinin 96,4%-i seçkilərdə iştirak edib”.
A. Qriqoryan bildirib ki, Ermənistanda, iqtisadi gücün mərkəzləşdirilməsi yalnız fövqəladə dərəcədə var-dövlətin mərkəzləşdirilməsi ilə müşayiət olunur. Ölkədə 44 ailə Ermənistanda Ümumi Daxili Məhsulun (ÜDM) 55%-ə nəzarət edir.
T. Petrosyanın müşavirinin fikrincə, rejim martın 20-də fövqəladə vəziyyətə son qoyulduğunu elan etsə də, küçələr hələ də azğınlaşmış polislə doludur, insanlar Şimal Prospektində gəzişməkdən başqa nə etsələr, həbs olunurlar: “Rejim iddia edir ki, dialoq istəyir, amma 145-dən artıq insan saxta ittihamlarla həbs olunub. Rejim azad sözə qarşı məhdudiyyətləri aradan qaldırıldığını desə də, vergi polisinə müxalifət qəzetlərinin hesab kitablarını yoxlamaq barədə göstəriş verib. Əgər rejim martın 1-də baş verən hadisələrlə bağlı beynəlxalq araşdırmalara imkan verməyəcəksə, mitinqlər, yürüşlər, yığıncaqlar, nümayişlər keçirmək haqqında qanuna son vaxtlar qəbul olunmuş qeyri-konstitusional düzəlişi ləğv etməkdən imtina edəcəksə, gələcəkdə hər hansı bir dialoq mümkünsüzdür. Rejim A1+ kanalına yayım üçün lisenziya verməlidir”.
A. Qriqoryan ABŞ və Qərbi birmənalı olaraq tiraniyaya qarşı azadlığın tərəfində durmağa çağırıb: “Azadlıq ilə tiraniya Ermənistanda gedən mübarizənin məhz iki tərəfidir”.
Qeyd edək ki, ABŞ Konqresinin Helsinki Komissiyasında Ermənistanda prezident seçkilərindən sonrakı vəziyyətə dair dinləmələr aprelin 17-də keçirilib.