Əmək və Əhalinin Sosial Müdafiəsi Nazirliyində Türkiyənin Azərbaycandakı səfirliyinin əmək və sosial müdafiə üzrə yeni müşaviri Ahmet Açıkgöz ilə tanışlıq görüşü olub.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, görüşdə Türkiyənin ölkəmizdəki fövqəladə və səlahiyyətli səfiri Erkan Özoral da iştirak edib.
Əmək və əhalinin sosial müdafiəsi naziri Səlim Müslümov A.Açıkgözü yeni vəzifəyə təyin olunması münasibəti ilə təbrik edərək, Azərbaycan və Türkiyə arasında bütün sahələrdə yüksək səviyyədə olan əlaqələrin əmək və sosial müdafiə sahəsini də əhatə etdiyini vurğulayıb. O həm beynəlxalq təşkilatlar, həm də ikitərəfli formatda əməkdaşlığın daim inkişaf etdirildiyini diqqətə çatdırıb.
S.Müslümov Azərbaycan Prezidenti İlham Əliyevin sosialyönümlü siyasətinə uyğun olaraq ölkəmizdə əhalinin sosial müdafiəsinin gücləndirilməsi istiqamətində atılan addımlar, əmək və sosial müdafiə sisteminin təkmilləşdirilməsi yönündə aparılan islahatlar barədə müşavirə məlumat verib. Nazir həmçinin icra olunan aktiv əmək bazarı proqramlarını, əmək bazarının tənzimlənməsi sahəsində aparılan işləri diqqətə çatdırıb: “Müvafiq sahələrdə görülən işlər, aparılan islahatlarda qardaş ölkə olan Türkiyənin Əmək və Sosial Müdafiə Nazirliyi ilə əməkdaşlığa, geniş məlumat və təcrübə mübadilələrinə xüsusi önəm verilir. Ötən dövrdə həyata keçirilən qarşılıqlı səfərlər, imzalanan əməkdaşlıq Sazişləri əlaqələrimizin inkişafına səbəb olub. Eyni zamanda, cari ilin fevral ayının əvvəllərində Türkiyənin əmək və sosial müdafiə naziri xanım Jülide Sarıeroğlunun rəhbərliyi ilə nümayəndə heyətinin ölkəmizə səfəri çərçivəsində keçirilən görüşlər, iki nazirlik arasında Əmək və sosial müdafiə sahəsində əməkdaşlıq üzrə Birgə Daimi Komissiyanın 9-cu iclasının yekunu olaraq imzalanan Protokol da ikitərəfli əməkdaşlığın xeyli genişlənməsinə imkan verib”.
Nazir bildirib ki, bu gün işçi qüvvəsinin əmək bazarında rəqabət qabiliyyətinin artırılması, sosial cəhətdən həssas əhali qrupları üçün inklüziv əmək bazarının inkişafı, qeyri-formal məşğulluq hallarının aradan qaldırılması, əmək münasibətlərinə nəzarət formalarının təkmilləşdirilməsi, əməyin təhlükəsizliyi və s. kimi aktual məsələlər mövcuddur. Türkiyənin müvafiq dövlət qurumu ilə əməkdaşlığımız həmin sahələrdə də davam etdirilir ki, bu da hər iki tərəf üçün faydalıdır.
S.Müslümov A.Açıkgözün iki ölkə arasında əmək və sosial müdafiə sahəsində əməkdaşlığın inkişafında öz töhfələrini verəcəyinə əminliyini ifadə edib.
A.Açıkgöz ötən dövrdə ölkələrimiz arasında bütün sahələrdə olduğu kimi, əmək və sosial müdafiə sahəsində də uğurlu əməkdaşlıq təcrübəsinin formalaşmasının məmnunluq doğurduğunu vurğulayıb. O bu istiqamətdə ikitərəfli əlaqələrin genişləndirilməsində öz səylərini göstərəcəyini bildirib.
Görüşdə iki ölkənin əmək və əhalinin sosial müdafiəsi sahəsində əməkdaşlığının mövcud vəziyyəti və inkişaf perspektivləri ilə əlaqədar fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
