Birləşmiş Ərəb Əmirliklərinin (BƏƏ) yaranması günü ilə əlaqədar tədbir keçirilib.
APA-nın xəbərinə görə, tədbirdə çıxış edən BƏƏ-nin ölkəmizdəki səfiri Mohamed Hamel Al Qubaisi deyib ki, ölkəsi 1971-ci il dekabrın 2-də yaranıb. Onun sözlərinə görə, son 10 il ərzində BƏƏ beynəlxalq səviyyədə çox yüksək insan inkişafı, təhlükəsizlik və sabitlik üzrə ən yaxşı ölkələr sırasına daxildir. Azərbaycan və BƏƏ arasındakı ikitərəfli dostluq münasibətlərinin olduğunu vurğulayan səfir bildirib ki, bu əlaqələrin kökü əməkdaşlıq və qarşılıqlı hörmət prinsiplərinə dayanır, iki ölkə və xalq güclü tərəfdaşdır. "Cari ilin 10 ayı ərzində Birləşmiş Ərəb Əmirliyindən Azərbaycana təxminən 100 min turistin gəlişini müşahidə etdik", - deyə səfir qeyd edib.
Azərbaycan xarici işlər nazirinin müavini Mahmud Məmmədquliyev bildirib ki, Azərbaycan və BƏƏ arasında əməkdaşlıq getdikcə möhkəmlənir: "Biz BMT, eləcə də digər beynəlxalq təşkilatlarda uğurlu əməkdaşlıq edirik. Birləşmiş Ərəb Əmirliyi hər zaman Dağlıq Qarabağ münaqişəsi ilə bağlı Azərbaycanın ədalətli mövqeyini dəstəkləyir". M. Məmmədquliyev qeyd edib ki, Azərbaycan BƏƏ ilə həm iqtisadi, həm də ticarət sahələrində əməkdaşlığa xüsusi önəm verir: "2016-cı ildə Azərbaycan və Birləşmiş Ərəb Əmirliyi arasında ticarət dövriyyəsi 70 min dollar təşkil edib. İki ölkə arasında ticarət əlaqələrinin daha da inkişafı üçün Birləşmiş Ərəb Əmirliyinin Azərbaycanın nəqliyyat dəhlizinin imkanlarından istifadəsini, Ələtdəki Azad İqtisadi Zonada Birləşmiş Ərəb Əmirlikləri şirkətlərinin də iştirakını təklif edirik. Gələn ilin mart ayında "İttihad" Airways Bakı-Əbu Dabi marşrutu üzrə uçuşları həyata keçirəcək".
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
