Media

Bakı. Fərid Mirzəyev – APA. "Prezident İlham Əliyevin Rasim Əliyevlə bağlı hadisəyə münasibəti qətiyyətli və prinsipial mövqedir. Bu mövqe cənab prezident tərəfindən ölkədə söz və mətbuat azadlığının təmin olunması sahəsində görülən konkret işlərin davamıdır".

Bunu APA-ya açıqlamasında millət vəkili, “Azərbaycan” qəzetinin baş redaktoru Bəxtiyar Sadıqov deyib.

Baş redaktor deyib ki, faciə baş verib: "Cavan insan fiziki təzyiqlərə məruz qalıb və sonradan dünyasını dəyişib. Bu, birmənalı cinayət hadisəsidir. Azərbaycan iqtidarı da cinayətdə əli olanların tapılıb cəzalandırılması üçün lazımi addımları atır. Prezident İlham Əliyev bu məsələ ilə bağlı münasibətində sosial şəbəkədəki fikir plüralizminə də Azərbaycandakı söz və mətbuat azadlığının tərkib hissəsi kimi baxdığını xüsusi vurğulayıb. Cənab prezident öz çıxışlarında dəfələrlə vurğulayıb ki, azad internet olduğu yerdə söz azadlığının məhdudlaşdırılmasından söhbət belə gedə bilməz. Bu mənada sosial şəbəkədə yazdığı fikrə görə jurnalist zorakılığa məruz qalıbsa, bu da müəyyən mənada söz azadlığına təhdid kimi səslənə bilər. Ona görə də prezident bu məsələyə öz qətiyyətli mövqeyini bildirib. Bir daha belə bir hadisənin baş verməməsi üçün bu hadisəni törədənlər hüquqi qaydada öz cəzalarını alacaqlar”.

B. Sadıqov R. Əliyevin cinayət hadisəsinə Azərbaycan dövlətinin mövqeyi kifayət qədər aydındır: “Rasim Əliyevin valideynləri də həqiqəti bilir. İndi bunu ayrı cür mənalandırmaq ölən insanın ruhuna narahatlıq gətirir. Mən həm də hər xırda hadisədən istifadə edib öz dövlətinin imicinə ziyan vurmaq istəyənlərin hərəkətini anormallıq hesab edirəm".

"Yeni Müsavat" qəzetinin baş redaktoru Rauf Arifoğlu da prezident İlham Əliyevin jurnalistin vəfatının araşdırılmasını nəzarətə götürməsindən məmnunluğunu ifadə edib: “Biz bunu gözləyirdik. Prezidentin sözləri söz və mətbuat azadlığı ilə bağlı gözlənən standartlar çərçivəsindədir. Buna görə də mən çox məmnunam. Ümid edirəm ki, prezidentin məsələyə ən yüksək səviyyədə münasibəti baş verən qətl hadisəsinin tam açılması və təqsirkarların bütünlüklə cəzalandırılması nəticəsini ortaya qoyacaq ”.

R. Arifoğlu eyni zamanda Rasim Əliyevin ölümünün Elmar Hüseynov və Rafiq Tağının qətlləri ilə eyniləşdirilməsini düzgün hesab etməyib: " Burada məsələ kifayət qədər aydındır. Rasim Əliyev tənqidi jurnalistikanın təmsilçisi olmayıb. Hakimiyyət əleyhinə, hansısa məmurla bağlı bir sətir belə tənqidi yazısı olmayan reportyorun ölümünü Elmar Hüseynovun, Rafiq Tağının qətli ilə eyniləşdirmək bu şəxslərin fəaliyyəətinə, missiyasına kölgə salır".

R. Arifoğlu deyib ki, Rasim Əliyevi qətlə yetirməkdə şübhəli bilinənlər də bəllidir: " Bu cinayət “facebook”da yazılan statusa görə baş verib və çox təəssüf ki, həyatını itirən tərəf jurnalist olub. Biz buna görə çox üzülürük. Səbəbkarların cəzalandırılmasını sona qədər tələb edəcəyik”.

“APA Holding”in rəhbəri Vüsalə Mahirqızı bildirib ki, prezident İlham Əliyevin hadisəyə münasibəti onun üçün də gözlənilən olub: "Azərbaycan prezidenti indiyə qədər media orqanları, həmçinin jurnalistlərlə, onların fəaliyyəti və səhhətləri ilə bağlı olan bütün məsələlərə həssas yanaşıb, müraciətləri müsbət cavablandırıb. Elə Mətbuat Şurası İdarə Heyətinin üzvləri ilə sonuncu görüşündə də prezident medianın onun ən yaxşı yardımçılarından biri olduğunu, medianın azad fəaliyyətinə xüsusi önəm verdiyini vurğulamışdı".

V. Mahirqızı deyib ki, prezident İlham Əliyevin hadisəyə münasibətində bundan sonra da xüsusilə jurnalist fəaliyyətinin təhlükəsizliyinin təmin olunması üçün zəruri tədbirlərin şəxsi nəzarəti altında davam etdiriləcəyini bildirməsi cəmiyyətin bütün təbəqələrinə mesajdır: " Bu qarant eyni zamanda jurnalistlərin bundan sonrakı fəaliyyətinə dəstək olacaq".

V. Mahirqızı qeyd edib ki, baş verən hadisə hamını sarsıdıb: " Jurnalistlər isə daha çox sarsılıblar. Cəmiyyətdə belə hadisənin baş verməsinin sarsıntısı ilə yanaşı jurnalist həmkarımızı itirməyin ağrısı da var. Mən tezliklə hüquq-mühafizə orqanlarının günahkarları cəzalandırması barədə açıqlamaları ilə tanış olacağımıza inanıram. Eyni zamanda biz bu hadisədən nəticə çıxarıb, həm media, həm də ailə və təhsil institutlarımızda dözümlülük, ictimai davranış qaydaları ilə bağlı yorulmadan təbliğat aparmalıyıq".

“Xalq Cəbhəsi” qəzetinin baş redaktoru Elçin Mirzəbəyli də prezident İlham Əliyevin məsələyə münasibətini ümumilikdə mediaya, azad sözə verilən qiymətin göstəricisi hesab edir: “Prezident İlham Əliyev hər zaman Azərbaycan mətbuatının problemlərinə diqqətlə yanaşıb və jurnalistlərlə bağlı məsələlərdə xüsusi həssaslıq nümayiş etdirib. Bu bir daha cənab prezidentin mediaya, azad sözə verdiyi qiymətin göstəricisi kimi dəyərləndirilməlidir. Baş verən hadisə şübhəsiz ki, üzücüdür. Amma bu kriminal, cinayət xarakterli hadisədir. Hesab edirəm ki, Azərbaycan mətbuatı, bütövlükdə vətəndaşlarımız da baş verən hadisədən nəticə çıxartmalıdırlar”.

Qeyd edək ki, avqustun 8-də bir qrup şəxs tərəfindən döyülən jurnalist R. Əliyev daxili qanaxma nəticəsində dünyasını dəyişib. R. Əliyev ölümündən öncə onu döyənlərin futbolçu Cavid Hüseynovun qohumları olduğunu iddia edib. Buna səbəb kimi “Facebook” sosial şəbəkəsində C. Hüseynovla bağlı yazdıqlarını göstərib. R. Əliyev Reportyorların Azadlığı və Təhlükəsizliyi İnstitutunun (RATİ) keçmiş əməkdaşı olub.

Azərbaycan prezidenti İlham Əliyev bu gün hadisədən ciddi narahat olduğunu bildirib, bu faktı ölkədə söz və məlumat azadlığına, kütləvi informasiya vasitələrinin müstəqil fəaliyyətinə təhlükə və təhdid kimi qiymətləndirərək qeyd edib ki, demokratik prinsiplərin mühüm tərkib hissəsi olan KİV azadlığının təmin edilməsi Azərbaycan dövlətinin ali məqsədi və prioritet vəzifələrindən biridir: “Bu prinsipin pozulması dövlətin maraqlarına və həyata keçirilən siyasətin mahiyyətinə tamamilə ziddir və yolverilməzdir”.

Ə. Həsənov bildirib ki, prezident İlham Əliyev Baş Prokurorluğa və Daxili İşlər Nazirliyinə məsələnin qısa müddətdə, tam təfsilatı ilə araşdırılması, cinayətkarların tapılması və məsuliyyətə cəlb edilməsi, habelə hadisənin baş vermə səbəbləri, istintaqın gedişi haqqında dövlət başçısının və ictimaiyyətin müntəzəm qaydada məlumatlandırılması ilə bağlı tapşırıqlar verib.

“Azərbaycan prezidenti məsələni şəxsi nəzarətində saxlayacağını və cinayətkarların tapılaraq qanuna uyğun şəkildə cəzalandırılacağını diqqətə çatdırıb. Cənab prezident bundan sonra da Azərbaycanda fundamental insan hüquq və azadlıqlarının, həmçinin söz və məlumat azadlığının, kütləvi informasiya vasitələrinin müstəqilliyinin və xüsusilə jurnalist fəaliyyətinin təhlükəsizliyinin təmin olunması üçün zəruri tədbirlərin şəxsi nəzarəti altında davam etdiriləcəyini bildirib”,

Daxili İşlər Nazirliyi (DİN) və Baş Prokurorluğun R. Əliyevin ölümü ilə bağlı birgə məlumatında qeyd olunub ki, hadisə ilə bağlı Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda) maddəsi ilə cinayət işi başlanıb.