Aqrar-sənaye kompleksi

Ana səhifə

Azərbaycanın bəzi bölgələrində çörək ucuzlaşıb

17 noyabr 2008 12:59 (UTC +04:00)

Bu barədə «APA-Economics»in keçirdiyi monitorinq zamanı məlum olub.
Araşdırmalar zamanı bəzi rayonlarda çörəyin qiymətinin təxminən 30% ucuzlaşdığı müəyyənləşib və bu tendensiya bir neçə bölgədə müşahidə olunub. Əksər bölgələrdə isə satışa çıxarılan çörəyin qiyməti dəyişməsə də, çəkisi təxminən 100-150 qram artırılıb.
APA-nın Naxçıvan bürosunun məlumatına görə, Muxtar Respublikada çörəyin qiyməti əvvəlki kimi 30 qəpik olsa da, çəkisi təxminən 50-100 qram artırılaraq 450 qrama çatdırılıb.
Göyçay və Dağlıq Şirvan bölgəsində isə çörəyin qiyməti oktyabrın əvvəli ilə müqayisədə 33% ucuzlaşaraq 30 qəpiyə düşüb, çəkidə dəyişmə baş verməyib.
Lənkəran rayonu da daxil olmaqla, respublikanın cənub rayonlarında satılan çörəyin çəkisi 150 qram artaraq 500 qrama çatıb. APA-nın Cənub bürosunun məlumatına görə, satışdakı çörəyin qiymətində enmə müşahidə olunmur.
Şirvan şəhəri daxil olmaqla, Muğan bölgəsinə daxil olan rayonların əksəriyyətində çörəyin çəkisinin 100-150 qram artmasına (hazırda 500 qram) baxmayaraq, qiymət 30 qəpik səviyyəsində qalıb. Lakin Salyan rayonunda 400-450 qramlıq çörək 20 qəpiyə çatılır.
Son 1 ay ərzində Azərbaycanın şimal rayonlarında isə çörəyin qiymətində 10 qəpik ucuzlaşma baş verib. Bununla yanaşı şimal rayonlarında 30 qəpiyə satılan çörəyin çəkisi də təxminən 100 qram azaldılaraq 400 qrama endirilib.
Aran rayonlarında isə çörəyin qiyməti dəyişməz qalıb. Yarım kiloqramlıq çörək 30 qəpiyə satılır. Ucar, Zərdab, Kürdəmir rayonlarında satılan çörəyin çəkisi əvvəlki aylarla müqayisədə 80-100 qram artırılıb.
Respublikanın ikinci böyük şəhəri Gəncə də daxil olmaqla, ölkənin qərb rayonlarında satılan çörəyin nə qiymətində enmə, nə də çəkisində artım var. Hazırda Gəncə şəhəri və ətraf rayonlarda 400 qram çəkidə çörək 40 qəpiyə satılır. Analoji vəziyyət Bərdə, Tərtər, Goranboy, Ağdam, Ağcabədi, Füzuli rayonlarında da mövcuddur. Azərbaycanın şimal-qərb rayonlarında da çörəyin çəkisi və qiymətində dəyişiklik baş verməyib. APA-nın yerli bürosunun məlumatına görə, Şəki və Zaqatala rayonlarında 500 və 600 qram çəkili çörəklər müvafiq olaraq 40 və 50 qəpiyə satılır.
Qeyd edək ki, Bakı şəhərinin əksər rayonlarında qiymət dəyişməz qalıb, çörəyin çəkisi isə bir qədər artırılıb.
Kənd Təsərrüfatı Nazirliyi aqrar islahatlar, kənd təsərrüfatı ərazilərinin və sahibkarlığın inkişafı şöbəsinin rəhbəri İslam İbrahimov isə «APA-Economics»ə açıqlamasında bildirib ki, bəzi rayonlarda çörəyin qiymətinin düşməsi, eləcə də çəkisinin artırılması ölkədə taxıl istehsalının artımı ilə bağlıdır: «Digər tərəfdən, bu ilin yayında hökumət ölkəyə idxal olunan taxılın gömrük rüsumları və əlavə dəyər vergisindən azad olunma müddətini daha bir il müddətinə artırıb. Bu da öz növbəsində bir sıra problemləri aradan qaldırıb və kifayət qədər taxıl ehtiyatı mövcuddur. Bu da möhtəkirlərin spekulyasiyalarına imkan vermir».
Nazirlik rəsmisinin sözlərinə görə, bu il ölkədə 2,481 mln. ton taxıl istehsal edilib ki, bu da 2007-ci ilin müvafiq dövrünə nisbətən 490 min ton və ya 24% çoxdur. Ölkədə istehsal edilmiş taxılın 1,650 mln. tonunu ərzaq buğdası təşkil edib.
Qeyd edək ki, cari ilin yanvar-sentyabr ayları ərzində Azərbaycana 790,8 min ton buğda, 81,1 min ton un idxal olunub.