Aqrar-sənaye kompleksi

Ana səhifə

Azərbaycanda tütün yarpağı istehsalı 5%, yaşıl çay yarpağı yığımı isə 33% azalıb

20 noyabr 2008 06:53 (UTC +04:00)

Bakı. Nicat Mustafayev – APA-Economics. Bu ilin yanvar-oktyabr ayları ərzində Azərbaycanda tütün yarpağı istehsalı 4,6% azalıb.
Dövlət Statistika Komitəsindən «APA-Economics»ə verilən məlumata görə, buna səbəb tütünün əkin sahəsinin 17,7% azalması olub ki, hesabat dövründə qurudulmuş çəkidə cəmi 2,5 min ton tütün yarpağı yığılıb.
Bundan başqa, mövsüm ərzində sahələrdən 1,053 mln. ton kartof, 1 190,1 min ton tərəvəz məhsulu toplanıb və keçən ilin müvafiq dövrümə nisbətən onların istehsal həcmi müvafiq olaraq 3,9% və 0,6% artıb. Bostan məhsulları istehsalı isə 2 % azalaraq 406,3 min tona enib.
Bu il noyabrın 3-ə kimi pambıq sahələrindən 46,7 min ton məhsul yığılıb emal müəssisələrinə satılıb. Cari ilin məhsulu üçün keçən ilə nisbətən 27,2 min hektar az sahədə əkin aparılması və pambıqçılıq üçün əlverişsiz hava şəraitinin olması məhsul istehsalına mənfi təsir edib. İlkin məlumatlara görə, bu il hər hektardan orta hesabla 9,6 sentner məhsul götürülüb.
Cari ildə 6,4 min hektar sahədə emal üçün şəkər çuğunduru əkilib. Hazırda 2,8 min hektar sahənin çuğunduru qazılıb və həmin sahələrdən hər hektardan 276 sentner olmaqla 76 min ton məhsul götürülüb.
Hesabat dövründə 573,8 min ton və yaxud keçən ildəkindən 11,4% çox meyvə və giləmeyvə, 99,6 min ton və yaxud 9,5% çox üzüm məhsulu toplanıb. Yaşıl çay yarpağı yığımı 32,9% azalaraq 307,3 ton təşkil edib.