Aqrar-sənaye kompleksi

Ana səhifə

Azərbaycanda qənd və şəkər tozu ucuzlaşıb

28 noyabr 2008 13:21 (UTC +04:00)

«APA-Economics»in Bakıda və bölgələrdə apardığı araşdırmalar zamanı məlum olub ki, bəzi rayonlarda şəkər tozu və qəndin qiymətində orta hesabla təxminən 5-10% ucuzlaşma baş verib. Bununla belə əksər rayonlarda qiymətlər əvvəlki aylarda olduğu səviyyədə qalıb.
Qəndin ən çox ucuzlaşması paytaxtda olub. Bakı şəhərinin pərakəndə satış məntəqələrində qəndin 1 kq-nın qiyməti oktyabr ayı ilə müqayisədə təxminən 17% və ya 20 qəpik düşərək 1 manata enib. Şəkər tozunun qiymətində isə 20% və ya 20 qəpik enmə qeydə alınıb və hazırda paytaxtda şəkər tozunun 1 kq-ı 80 qəpiyə satılır.
APA-nın Cənub bürosunun verdiyi məlumata görə, Azərbaycanın Lənkəran da daxil olmaqla, cənub rayonlarında son bir ayda qəndin qiyməti dəyişməz (80 qəpik) qalsa da, şəkər tozu təxminən 6,3% və ya 5 qəpik ucuzlaşaraq 1 kq üçün 75 qəpik təşkil edib. Analoji qiymət Gəncə şəhərində də mövcuddur. Şəkər tozunun pərakəndə satış qiymətində 6,3% azalmanın qeydə alındığı Gəncədə qəndin qiyməti dəyişməyib (1 manat).
APA-nın Mil-Muğan bürosunun məlumatına görə, Şirvan şəhəri də daxil olmaqla, mərkəzi rayonlarda nə qəndin, nə də şəkər tozunun qiymətində enmə olmayıb. Qiymətlər müvafiq olaraq 90 və 80 qəpik qalıb.
Kürdəmir, Ucar, Zərdab rayonlarında da qiymət azalması olmayıb. APA-nın Aran bürosunun verdiyi məlumatlara görə, bu rayonlarda qənd və şəkər tozunun qiyməti oktyabr ayı ilə eyni səviyyədədir - 90 qəpik və 80 qəpik.
APA-nın Şirvan bürosunun məlumatına görə, Göyçay və İsmayıllı rayonlarında şəkər tozunun qiyməti 80 qəpikdir və ötən ayla müqayisədə dəyişməyib. Qəndin qiyməti isə 10% enərək 90 qəpik olub.
Bərdə, Tərtər, Ağdam, Ağcabədi və Goranboyda da qiymət dəyişməsi müşahidə olunmayıb. APA-nın Qarabağ bürosunun məlumatına görə, qəndin və şəkər tozunun qiyməti bu rayonlarda oktyabrdakı kimi müvafiq olaraq 1 manat və 80 qəpikdir.
Naxçıvan Muxtar Respublikasında isə qəndin qiymətində (80 qəpik) dəyişiklik baş verməsə də, şəkər tozu 25% və ya 20 qəpik ucuzlaşaraq 60 qəpiyə düşüb.
Azərbaycanın əsas şəkər istehsalçısı olan «Azersun Holding» Şirkətlər Qrupunun mətbuat xidmətinin rəhbəri Afiq Səmədov isə «APA-Economics»ə şirkətin bu yaxınlarda şəkər tozunun topdan satış qiymətində 5% endirim etdiyini bildirib. A.Səmədovun sözlərinə görə, qiymətlərin daha da azaldılması planlaşdırılır.
Şirkət nümayəndəsi qiymətlərin enməsini dünyada xammalın ucuzlaşması, eləcə də ölkədə şəkər çuğunduru istehsalında artımın olması ilə əlaqələndirib.
Qeyd edək ki, bu il Azərbaycanda təxminən 6 min ha sahədə şəkər çuğunduru əkilib və 2500-ə yaxın mülkiyyətçi ilə müqavilə bağlanıb. Bu il ölkədə şəkər çuğunduru istehsalının 230 min ton təşkil edəcəyi gözlənilir. Azərbaycanda şəkər tozuna illik tələbat 150-180 min tondur.
Dövlət Gömrük Komitəsinin (DGK) məlumatına görə, cari ilin yanvar-oktyabr aylarında Azərbaycana xaricdən 77 756 min ABŞ dolları dəyərində 220 373,3 ton şəkər tozu idxal olunub. İdxal edilmiş şəkər tozunun həcmi 2007-ci ilin müvafiq dövrü ilə müqayisədə 12,4% azalıb.
Qeyd edək ki, cari il ərzində qənd və şəkər tozunun qiymətinin ən aşağı səviyyəsi yanvar ayında olub. Yanvarda 1 kq qəndin pərakəndə satış qiyməti 80 qəpik, şəkər tozunun isə 70 qəpik təşkil edib. Fevral-iyun aylarında isə qəndin qiyməti 1 manat, şəkər tozunun 70 qəpik, iyulda qənd 1 manat, şəkər tozu 75 qəpik olub. Qənd və şəkər tozunun qiymətinin ən yuxarı həddi avqust və sentyabr aylarında müvafiq olaraq 1,2 manat və 1 manat səviyyəsində qeydə alınıb. Oktyabrda qəndin qiymətində enmə olmasa da, şəkər tozu 10 qəpik ucuzlaşaraq 90 qəpiyə düşüb.
Məlumat üçün bildirək ki, hazırda topdansatış məntəqələrində şəkər tozunun 50 kq-lıq kisəsi 35,4 manata (1 kq - 70 qəpik) satılır.