Aqrar-sənaye kompleksi

Ana səhifə

Rusiya Azərbaycanda pivə istehsalının inkişafına 20 mln. dollar yatıracaq

01 dekabr 2008 06:58 (UTC +04:00)

Bakı. Rəşad Süleymanov – APA-Economics. Rusiyanın «Baltika» şirkəti Azərbaycanın «Bakı Kastel» pivə zavodunun yenidən qurulmasına 20 mln. ABŞ dolları sərmayə yatırmağı planlaşdırır. Bu barədə «APA-Economics»ə şirkətdən məlumat verilib.
Bu vəsait hesabına Xırdalan şəhərində yerləşən pivə zavodunun bişirmə sistemi, qıcqıra və filtrasiya sahələrinin modernləşdirilməsi, şüşə butulkaya süzmə xəttinin təkmilləşdirilməsi həyata keçiriləcək. Şirkət həmçinin PET-qablaşdırmada pivənin saxlama müddətini artıran, yüksək keyfiyyətli pivə istehsalına imkan yaradan yüksək texnoloji PET-qablaşdırmaya süzmə xəttinin qurulmasını planlaşdırır. Azərbaycan üçün yeni olan bu texnologiya PET-butulkada pivənin keyfiyyət və dad xüsusiyyətlərini itirmədən uzun müddət saxlamağa imkan yaradacaq.
Şirkətdən verilən məlumata görə, «Bakı-Baltika» şirkəti «Bakı-Kastel»ə məxsus «Bizim pivə», «Əfsanə» və «Xırdalan» pivə çeşidlərini daha da inkişaf etdirməyi planlaşdırır. Bu brendlər PET-butulkalarda yeni etiketlərlə istehsal ediləcək. Bundan başqa, 2009-cu ilin yay mövsümünə qədər zavodda «Baltika» və «Arsenalnoye» brendlərinin istehsalına başlanacaq.
Xatırladaq ki, «Bakı Kastel» pivə zavodu 2009-cu ilin yanvar ayından «Bakı Baltika» adlanacaq və may ayından müəssisə «Baltika» brendi ilə məhsul istehsalına başlayacaq.
Hazırda müəssisənin illik istehsal gücü 3 mln. dekalitrə yaxındır.
Qeyd edək ki, «Bakı Kastel» zavodunun alınmasına dair «Baltika» şirkəti ilə «Brasseries İnternational Holding» şirkəti arasında müqavilə 2008-ci ilin may ayında imzalanıb.