Bakı. Aqşin Rafiqoğlu – APA-Economics. Ötən il Azərbaycanın sənaye sektorunda istehsal olunmuş malların və göstərilmiş xidmətlərin həcmi 33,7 mlrd. manat təşkil edərək əvvəlki illə müqayisədə 1,8% artıb.
«APA-Economics»in Dövlət Statistika Komitəsinə istinadən verdiyi məlumata görə, qeyri-neft bölməsində 4,8%, neft bölməsində isə 1,1% artım müşahidə olunub. Sənaye məhsulunun 74,0%-i mədənçıxarma, 20,1%-i emal, 5,3%-i elektrik enerjisi, qaz və buxar istehsalı, bölüşdürülməsi və təchizatı, 0,6%-i isə su təchizatı, tullantıların təmizlənməsi və emalı bölmələrində istehsal olunub.
Özəl bölmədə istehsalın həcmi sənaye məhsulunun 81,4%-ni təşkil edib, ümumi istehsalın 93,1%-i sənaye mallarının (əmtəələrin) istehsalı, 6,9%-i isə sənaye xarakterli xidmətlərin göstərilməsi hesabına yaradılıb.
İstehsal edilmiş sənaye məhsulunun əksər hissəsi istehlakçılara göndərilib, müəssisələrin anbarlarında 251,3 mln. manatlıq məhsul ehtiyatı qalıb. Ehtiyatların 65,0%-i Bakı, 9,6%-i Sumqayıt, 1,6%-i Gəncə, 1,4%-i Şirvan və 0,3%-i Mingəçevir şəhərləri, qalan hissəsi isə digər rayonların sənaye müəssisələrinin anbarlarında qalıb. Sənaye müəssisələrinin anbarlarında satış üçün nəzərdə tutularaq başqa müəssisələrdən alınmış 18,2 mln. manatlıq digər mallar da mövcud olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
