Bakı. Cavid Zeynalov - APA. Noyabrın 28-də AMEA-nın Əlyazmalar İnstitutunda Türkiyə Baş Nazirliyi nəzdindəki Dövlət Arxivlərinin baş müdir yardımçısı Mustafa Budaqla görüş keçirilib.
İnstitutun direktor əvəzi Paşa Əlioğlunun APA-ya verdiyi məlumata görə, işgüzar görüşdə qarşılıqlı əməkdaşlıq sahəsində danışıqlar aparılıb, təcrübələrin bölüşdürülməsi işində anlaşma əldə olunub.
Görüşdə P.Əlioğlu Türkiyənin müxtəlif müəssisələri ilə faydalı əməkdaşlıqdan danışıb, Mustafa Budaqla və onun çalışdığı müəssisə ilə əlaqələrdən çox şey gözlədiyini bildirib.
M.Budaq çıxışında fəaliyyət göstərdiyi müəssisənin işi, özünün təcrübəsi barədə məlumat verib, Türkiyədə Azərbaycana dair çoxlu sənədlərin mövcudluğunu qeyd edib: “Hesab edirəm ki, hər iki müəssisə - Əlyazmalar İnstitutu və Türkiyənin Baş Nazirliyi nəzdindəki Dövlət Arxivləri İdarəsi arasındakı əlaqələrin genişləndirilməsi, tariximizin, mədəniyyətimizin öyrənilməsinə böyük fayda verə bilər”.