Asiya

Ana səhifə

Asiya

İstanbuldakı Okan Universitetinin rektoru: “Rus-Türk universitetinin yaradılması ilə bağlı bəzi danışıqlar aparılır”

20 oktyabr 2009 23:41 (UTC +04:00)

İstanbul. Mayis Əlizadə - APA. Türkiyənin Okan Universitetinin rektoru, professor Sadık Kırbaşın APA-nın Türkiyə bürosuna müsahibəsi

- Türkiyənin özəl universitetləri arasında rektoru olduğunuz təhsil qurumu yüksələn qrafikini görürük. Universitetinizi kim yaratdı və 6 ildə bu duruma necə gəldiniz?

- Okan Universiteti 2003-2004 tədris ilində fəaliyyətə başladı. Quruluş fəlsəfəmiz etibarilə biz iş dünyasına yaxın bir universitetik. Universitetimizin bağlı olduğu vəqfi quran iş adamları 40 ildən bəri Türkiyədə və Avrasiya bölgəsində iri həcmli investisiyaları olan şəxslərdir. Biz universiteti yaradarkən bölgənin xüsusiyyətlərini nəzərə almışıq. Belə ki, Avrasiya bölgəsində 200 milyondan artıq adam rusca danışır. Uzaq Şərqdə isə Çinin önəmli potensialı var. Buna görə də universitetdə rus və çin dilləri üzrə tərcüməçilər yetişdirən bölümlər yaratdıq. Bu ilsə ərəbcə tərcüməçilik proqramını həyata keçirməyə başlamışıq. Bəzi proqramlar üzrə dərs alan tələbələrimiz artıq məzun olmağa hazırlaşır. Bununla kifayətlənməyərək Avrasiya Araşdırmaları və Tətbiqatları mərkəzini də yaratdıq.

Bölgə ilə bağlı elmi konfranslar keçirir, oradan gələn önəmli şəxsiyyətlərin Türk iş və elm dünyası ilə qaynayıb-qarışmasına çalışırıq. Mərkəzimiz bölgəyə investisiya qoymaq istəyən iş adamları üçün önəmli məlumat mərkəzi halına gəlib. Həftəlik bülletenlərimiz Avrasiya bölgəsinə getmək istəyən iş adamlarına investisiyanın şərtləri barədə ətraflı məlumatlar verir. Bizim ABŞ və AB universitetləri ilə əməkdaşlıq protokollarımız var, ancaq Avrasiya bölgəsində ali təhsil müəssisələri və araşdırma qurumları ilə də əməkdaşlıq etmək, İstanbulda müştərək proqramlar həyata keçirmək istəyirik. Məqsədimiz Avrasiya ilə Qərb dünyası arasında körpü olmaqdır. Universitetimizdə Puşkin adına araşdırmalar mərkəzi yaratmışıq. Çinin önəmli imtahan mərkəzlərindən biri bizim universitetimizdir. Bu yaxınlarda Konfutsi Mərkəzi də yaradacağıq. Rus-Türk universitetinin yaradılması ilə bağlı bəzi danışıqlar aparılır. Struktur etibarilə universitetimiz bu işin həyata keçirilməsində də önəmli rol oynayacaq.

- Sankt-Peterburq Universitetindəki türkologiya fakültəsinin 155 yaşı var. Türkiyə qonşu ölkələrlə bağlı elmi çalışmalarda çox geridə qalır. Sizin atdığınız addımların önəmi bu mənzərə içində daha yaxşı görünür. Elmi əlaqələri gücləndirmək istəyirsiniz. Bəs mədəni əlaqələr sahəsində hansı konkret addımları atmağı düşünürsünüz?

- Mən Sankt-Peterburqdakı mədəniyyət abidələri və muzeylərdən çox təsirləndim. Eləcə də Orta Asiyada. Biz Avrasiya ölkələrindəki universitetlərlə bütün sahələrdə əməkdaşlığı qarşıya məqsəd qoymuşuq. İndi Rusiya və Çinə daha çox tələbə göndəririk. Xaricdən bizə təhsil almağa gələn tələbələrin sayı daha da artır - biz onlar üçün ayrıca siniflər yaratdıq. Yeni proqramları həyata keçirməkdən qətiyyən çəkinmirik. Dəqiq elmlər sahəsində geniş təcrübəsi olan universitetlərlə əməkdaşlığa xüsusi əhəmiyyət verir, onların laboratoriya çalışmalarında biz də iştirak edirik. Bölgədəki universitetlərin sıx əməkdaşlığa başlaması lazımdır. Xüsusilə dəqiq elmlər, mühəndislik, incəsənət sahəsindəki əməkdaşlığımız çox səmərəli olacaq.

- Azərbaycan və ya Rusiyanın incəsənət qurumları ilə əməkdaşlığınız çox faydalı olacaq. Bunu universitetinizə gələn Sankt-Peterburqdakı V.İ.Muxina adına İncəsənət Akademiyasının məzunu, rəssam Sadıq Babayev də təsdiqləyir...

- İncəsənət fakültəmizin qabağında Puşkinin heykəli vardır - biz dünyada Puşkinə heykəl qoyan yeganə universitetik. Bu, ədəbiyyata və sənətə verdiyimiz önəmi göstərir.

- Universitetinizin öz nəşrləri varmı? Yaxın gələcəkdə müxtəlif dillərdə jurnal və kitab çap edəcək nəşriyyat yaratmağı düşünürsünüzmü? Çünki Avrasiya bölgəsindəki elmi işlərin Türkiyədə çapına da böyük ehtiyac vardır.

- Universitetimiz seriya şəklində məcmuə və kitablar çap edəcək. Bu baxımdan vəqf universitetlərinin imkanları dövlət universitetlərinə nisbətən daha genişdir. Ona görə də bizə gələn bütün layihələri dəyərləndirib müştərək proqramlar həyata keçirmək istəyirik. APA agentliyi vasitəsilə bölgəyə vermək istədiyimiz mesaj budur: “Bütün sahələrdə daha çox əməkdaşlıq edək. Beynəlxalq miqyasda ortaq çalışaq!”