Asiya

Ana səhifə

Asiya

Ayətullah Xamnei: “Azərbaycan xalqı bütün dövrlərdə şücaət göstərib”

17 fevral 2010 16:28 (UTC +04:00)

Bakı. Süleyman Fərzəliyev - APA. “İran xalqının fevralın 11-də izdihamlı mitinqləri sözün əsil mənasında ilahinin bir möcüzəsi idi”. APA-nın “İribnews”a istinadən verdiyi məlumata görə, İranın ali dini rəhbəri Ayətullah Seyid Əli Xamnei bu sözləri bu gün Tehranda Şərqi Azərbaycandan gəlmiş, əksəriyyəti azərbaycanlılar olan vətəndaşlarla görüşündə deyib. Ali dini rəhbər İranın inkişaf etdiyini, İranı sevməyənlərin, düşmən mövqeyində olanların isə bundan narahat olduqlarını bildirib.
O, İranın həmişə sülh tərəfdarı olduğunu da vurğulayıb: “ABŞ və İsrail isə dünyada cinayətlər törədir, məzlum xalqlara zülm edir. Bu dövlətlərin heç öz xalqından belə xəbəri yoxdur, bəzən xalq da onları qəbul etmir, belə bir vəziyyətdə isə İranı İslam dövləti olmaqda ittiham edirlər. İnsan hüquqlarından danışırlar, amma heç zaman ona əməl etmirlər”.
Ayətullah Xamnei Azərbaycan xalqının bütün dövrlərdə şücaət göstərdiyini qeyd edərək, Təbriz camaatının İslam İnqilabını ilk başlayanlardan və davamçılarından olduğunu bildirib. Ali dini rəhbər azərbaycanlıları qeyrətli xalq adlandıraraq, onun fitnələr qarşısında imtahandan həmişə üzüağ çıxdığını bəyan edib.
Qeyd edək ki, İran İslam İnqilabı 1977-ci il 18 fevralda Təbriz şəhərində başlayıb, bunun ardınca bütün İran xalqı təbrizlilərə qoşularaq şah rejiminin yıxılmasına nail olub. Bu tarixi hadisədən sonra İranın ali dini rəhbəri azərbaycanlıları xüsusi olaraq hər il 18 fevralda qəbul edir.
Azərbaycanlıları İran İslam İnqilabının banisi İmam Xomeyni də ölümünə qədər xüsusi olaraq hər ilin həmin günü “Camaran” məscidində qəbul edib. İ. Xomeyni azərbaycanlıları vəfalı, qeyrətli, ayıq, elmli və şücaətli adlandıraraq, onların fitnəkarların cavabını tarixin bütün dövrlərində verməyə qadir olduqlarını bildirib.

İran