Asiya

Ana səhifə

Asiya

İran Hörmüz boğazında təlimlərə başlayacaq

06 yanvar 2012 08:31 (UTC +04:00)

APA-nın məlumatına görə, korpusun dəniz qüvvələrinin komandanı admiral Əli Fədəvi bildirib ki, bu cür təlimlər yeddi ildir keçirilir, lakin bu ilki təlimlər əvvəlki manevrlərdən fərqlənəcək.

Bu yaxınlarda İran Hərbi Dəniz Qüvvələri “Vilayət-90” şərti adı altında təlim keçirib. Təlimdə uzaq mənzilli raket sınaqdan çıxarılıb. Təlim keçirilən ərazi Hörmüz boğazından Oman körfəzinə kimi 2 min kvadrat kilometr ərazidə beynəlxalq suları əhatə edib.

İran rəhbərliyinin Hörmüz boğazını keçid üçün bağlayacağı barədə bəyanatı beynəlxalq arenada gərginliyə səbəb olub. Fars Körfəzindən neft və qazın daşınması üçün bu boğazdan istifadə olunur. İran parlamentinin milli təhlükəsizlik məsələləri üzrə komissiyasının sədri Pərviz Sərvəri təlimlərlə əlaqədar Hörmüz boğazının gəmilərin keçidi üçün bağlanacağı barədə bəyanatı beynəlxalq bazarda neftin qiymətinin bahalaşmasına səbəb olub. Daha sonra İran Xarici İşlər Nazirliyinin mətbuat katibi Ramin Mehmanpərəst bildirib ki, boğazda gəmilərin keçidi üçün heç bir problem yaradılmayacaq.

Dekabrın 27-də İranın vitse-prezidenti Məhəmməd Pza Rəhimi bildirib ki, əgər Qərb ölkələri İrandan neft idxalına sanksiya tətbiq etsələr, İran Hörmüz boğazını gəmilərin keçidi üçün bağlı elan edəcək. Bəhreyndə dislokasiya olunmuş ABŞ Hərbi Dəniz Qüvvələrinin beşinci donanmasının komandanlığı isə bəyan edib ki, Hörmüz boğazında gəmilərin hərəkəti üçün hər hansı maneə yaradılmasına imkan verilməyəcək.

Qeyd edək ki, Hörmüz boğazı Fars körfəzində hasil olunan neft və qazın daşınması üçün istifadə olunan əsas dəniz yoludur. Hörmüz boğazının şimal sahilinə İran, cənub sahilinə isə ABŞ-ın müttəfiqləri olan BƏƏ və Oman nəzarət edir.