Asiya

Ana səhifə

Asiya

“İran İnsan Haqları Kampaniyası” ölkə rəhbərliyini edam cəzasını ləğv etməyə çağırıb

06 yanvar 2012 09:50 (UTC +04:00)

Bakı. Könül Cəfərli - APA. “İran İnsan Haqları Kampaniyası” adlı təşkilat Məşhəd şəhərində gizli şəkildə edam olunan şəxslərdən 101 nəfərin adını açıqlayıb. APA-nın məlumatına görə, təşkilatın yaydığı hesabatda deyilir ki, məhbuslar 2010-cu ilin 9 iyun və 20 dekabr tarixləri arasında Məşhəd şəhərinin Vəkilabad həbsxanasında dara çəkiliblər.

Hesabatda 2011-ci ildə Məşhəd və digər şəhərlərdə 471 nəfərin gizli şəkildə edam olunduğu bildirilib: “Bundan onların ailəsinin də xəbəri olmayıb. Məhbusların bir çoxu kütləvi şəkildə dara çəkilib. Hətta edam olunan şəxslərə qərarın icra olunacağı ilə bağlı bir neçə saat əvvəl xəbər verilib. Vəkilabad həbsxanasının məmurları günbatan çağı məhbusları üstü açıq dəhlizdə asıblar. Edam vaxtı həbsxana ilə telefon əlaqəsi kəsilib. Həkimlər edamdan bir gün əvvəl məhbusların ölümünün qanuni olması haqda sənədlər hazırlayıb”.

Hesabatda deyilir ki, İranda həyata keçirilən edamlar heç bir beynəlxalq qaydalara uyğun deyil: “Edamların əksəriyyəti tez icra edilib. Edam edilənlərin bir çoxu xarici vətəndaşlar olub. Bunlar Əfqanıstan, Qana, Nigeriya və s. ölkələrin vətəndaşlarıdır. Onlara ölkələrinin İrandakı səfirlikləri ilə əlaqə saxlamağa imkan verilməyib. Edam olunanların əksəriyyəti məcburiyyət qarşısında narkotik maddələrin alqı-satqısı ilə məşğul olublar. Beynəlxalq qanunlara görə narkotik maddələrin alqı-satqısının cəzası edam deyil. İran bu konvensiyanı 1975-ci ildə imzalayıb. 100 qram narkotik maddə üçün edam cəzasının tətbiqi düzgün deyil. BMT-nin İnsan Haqları Komitəsi öz hesabatında narkotik maddələrin alqı-satqısının ciddi cəza sayılmadığını və İranın buna görə edamlar həyata keçirməklə beynəlxalq qanunları tapdaladığını bəyan edib”.

Sənədin sonunda təşkilat İran parlamentini və Ali Məhkəməsini ölkədə edamların qarşısını almağa və tezliklə bu cəza növünü ləğv etməyə çağırıb.

iran_edam