Avropa

Ana səhifə

Avropa

Latviyada 4 nazir istefa verib

22 mart 2010 10:05 (UTC +04:00)

Bakı – APA. Bu gün Latviya Xalq Partiyasının üzvü olan 4 nazir istefa verib. APA-nın məlumatına görə, istefa ərizələri artıq hökumət başçısı Valdis Dombrovskisa təqdim olunub.
Hökumətdən istefa verənlər arasında xarici işlər naziri Maris Riyekstinş, ədliyyə naziri Marek Seqlinş, səhiyyə naziri Bayba Rozentale və regional inkişaf məsələləri üzrə nazir Edqar Zalans var. Hökumətdə Xalq Partiyasını təmsil edən daha bir nazir – Mədəniyyət Nazirliyinin başçısı İnt Dalderis isə istefa verməkdən imtina edib və partiya sıralarını tərk edərək hökumətdə işini bitərəf nümayəndə kimi davam etdirmək qərarına gəlib.
Nazirlərin istefası Xalq Partiyasının müxalifətə keçməsi ilə bağlı qərarından sonra baş verib. Partiya hökumətin iqtisadi siyasəti ilə razılaşmayaraq müxalifətə qoşulub. Müşahidəçilər isə Xalq Partiyasının bu qərarını payızda keçirilməsi planlaşdırılan parlament seçkiləri öncəsi reytinqin yüksəldilməsinə istiqamətlənmiş bir addım kimi qiymətləndirirlər.
Qeyd edək ki, Xalq Partiyasının müxalifətə keçməsindən sonra Latviya hökuməti parlamentdəki səs çoxluğundan məhrum olub.