Avropa

Ana səhifə

Avropa

Londonda Pasxa festivalının keçirilməsinə hazırlıq başlayıb

08 fevral 2012 13:11 (UTC +04:00)

Bakı-APA. Londonda Pasxa festivalının keçirilməsinə hazırlıq başlayıb. APA-nın məlumatına görə, bu barədə "General Fabergé AfC" zərgərlik evinin məlumatında bildirilib.

Məlumata görə, fevralın 21-dən London "Faberjenin böyük ov yumurtası" ("Big Egg Hunt") xeyriyyəçilik tədbiri çərçivəsində 200 nəhəng Pasxa yumurtasının evi olacaq.
Tədbir uşaqların həyat şəraitinin yaxşılaşmasına və fillərin xilası üçün xeyriyyəçilik məqsədlərinə yönəlib. Tədbirdə iştirak edəcək turistlər, yerli sakinlər və qonaqlar həqiqi mənada sehrli təcrübə əldə edəcəklər.

Layihədən əldə edilən vəsait sosial cəhətdən müdafiəsiz uşaq və yeniyetmələrə dəstək verən "Action for Children" Uşaqlara Kömək Fonduna və "Elephant Family" Asiya Fillərinin Ümumdünya Müdafiə Fonduna köçürüləcək.

Bu nümayişin iştirakçıları qiymətli daşlarla bəzədilən və Mallberi, ser Ridli Skott, Zandru Rodes, Diana fon Fürstenberq, Mark Kuin, Brüs Oldfild, Çepmen qardaşları, Teo Fennella, Uilyam Kerli, Parr və Polli Morqan daxil olmaqla dünyanın qabaqcıl ifaçıları, memarları, zərgərləri və dizaynerlərinin hazırladıqları nəhəng Pasxa yumurtalarını görə biləcəklər.

Məlumatda bildirilib ki, "Faberjenin böyük ov yumurtası" festivalının iştirakçıları dünyada ən qeyri-adi mükafat - "Faberjenin Tribute yumurtası"nı qazanmaq şansına malik olacaqlar. 100 min funt-sterlinqdən çox qiyməti olan yumurta əfsanəvi eksklüziv incəsənət əsəridir.

Festival iştirakçıları üçün dünyada ən bahalı şokolad yumurta hazırlanır ki, onun da dizayneri Uilyam Kerlidir. Təşkilatçıların ideyasına əsasən, festival Ginnesin Rekordlar Kitabına düşməlidir və əldə ediləcək 2 milyon funt sterlinq xeyriyyəçilik məqsədlərinə ayrılacaq.

İncəsənətin kolleksiya əsərləri olacaq Pasxa yumurtalarını hərracda əldə etmək mümkün olacaq. Hərrac tacının mirvarisi "’Le Collier Plume d’Or’ by Fabergé"nin 127 zümrüdündən ibarət olan eksklüziv dizaynlı qızıl kulon olacaq.

Uşaqlara kömək proqramının rəhbəri Deym Kler Tikell deyib ki, "Faberjenin böyük ov yumurtası" bu aksiyanın iştirakçılarının diqqətini Böyük Britaniyadakı himayəsiz uşaq, qadın və ailələrə yönəltməkdir.

"Elephant Family" fillərin xilas edilməsi üzrə proqramın direktoru Rut Povis isə uşaqların və məhv olan heyvan növlərinin müdafiəsi üçün həyati əhəmiyyət olan təşəbbüsü alqışladığını bildirib.

Məşhur zərgər, Karla Faberje evinin əsasını qoyanın nəticəsi Sara Faberjenin sözlərinə görə, Pasxa yumurtaları Faberjenin sinonimi olub və birini digərindən ayrı təsəvvür etmək mümkün deyil. Onun sözlərinə görə, bir sıra xalq və mədəniyyətlər üçün yumurta yeni həyat və dirçəlişin rəmzidir.

Qeyd edək ki, festivalda nümayiş etdiriləcək əsərlər arasında Heydər Əliyev Fondunun vitse-prezidenti Leyla Əliyevanın da əl işləri var. L. Əliyeva festivala təqdim etdiyi rəsm əsərləri ilə bağlı bunları bildirib: “Mən dünyada ən güclü və ən qədim münasibətin rəmzi olan ana və uşağı təsvir edərək, yumurtanın kövrəkliyini və məsumluğunu göstərmək istəyirdim. Həyat qarşılıqlı asılılıq və sevgiyə dayanan bu cür əsaslı və dövri əlaqələrlə doludur”.

Pasxa